Topico di impuesto di BBO na frontera tambe ta hayando reaccion di otro instancianan, como por ehemplo Aruba Hotel and Tourism Association (AHATA), den cual Tisa LaSorte, ken ta fungi como presidente y CEO, tambe a duna su comentario riba esaki.
“E ley di BBO na frontera cu ta na Parlamento actualmente, ta causa cu Aruba ta bira mas caro pa local y pa turista. Restaurant y hotel ta specificamente exclui di por trek af cualkier BBO paga na frontera for di BBO cu ta colecta di cliente den restaurant. Esey kiermen cu gasto operacional ta subi, cual ta causa prijs mas halto pa cliente,” el a bisa.
Tambe La Sorte a señala cu esaki ta causa prijs mas halto pa actividadnan cu turista ta gosa di dje y te hasta pa pacusnan unda ta cumpra cos. Un pacus cu ta bende T-shirt, por ehempel, lo tin mas gasto, “pasobra, nan por trek af e BBO cu ta paga riba e T-shirt cu ta importa, pero no e reki cu ta importa pa pone den pacus, of e forklift cu mester cumpra pa warehouse. E BBO na frontera ta haci renobacion di hotel mas caro tambe. Riba e 22% di invoerrechten pa mueblenan, awor mester paga 7% di BBO ariba dje tambe. Esey por resulta den menos renobacion cu ta resulta den un producto turistico menos atractivo.”
Den su opinion, La Sorte a indica cu “Aruba ta considera un destinacion caro caba, y awor ta bay haci’e mas caro sin cu e balor of calidad di Aruba como destinacion ta subi.”
“Mientrastanto, ainda nos tin problema cu no por haya basta empleado pa duna servicio optimal. Y hopi turista di Merca a cuminsa scoge pa bay Europa en bes di Caribe. Kiermen net ora demanda ta cuminsa baha, ta haci Aruba mas caro y no ta yuda cu incentiva pa Aruba su producto turistico keda competitivo den e mercado.” LaSorte a sigura.
Pa finalisa, el a declara cu “nos miedo ta cu Gobierno ta ignorando efecto negativo riba economia y comunidad riba termino largo y ta enfoca solamente riba e entrada cu nan kier hisa pa nan mes mas lihe posibel.”
