Diadomingo Osvaldo Campos, un ciudadano Chileno a cuminsa un tiroteo na casino Monticello, cerca di capital di Chile, Santiago. Den e tiroteo el a asesina dos persona y laga cuatro mas herida. Un dia despues di e suceso, informacion y potret a circula y ta mustra e momento di atake.
Den e material por mira e momento cu Campos a saca su arma di candela y el a tira di hopi cerca riba e croupier y un muhe cu tabata traha na e mesa di casino ey. Tur dos a muri pa e tironan di arma di candela.
Den un video por mira e homber cu a sconde su mes bao di un mesa y asina e tabata purba di evita algun tiro di banda di seguridad di casino. Despues di e atake e homber a cera su mes par di ora den baño y despues a mata su mes. Testigonan a logra huy na momento di e tiroteo y nan a bisa cu e homber a saca su arma despues cu el a perde hopi placa na e casino. Fiscalia a informa cu Campos tabatin antecedente penal pa secuestro. Den un luna e casino Monticello a pasa dendos suceso di violencia.
Dia 6 di juni cu a pasa un homber di nacionalidad di Siria a tira riba un agente di seguridad despues cu el a perde 15 miyon di peso (22.700 dollar).
