Tiramento di sushi riba beach nan rond di Aruba a cuminsa bira di mas segun
Lex Van Vugt kende tin 20 aña ta traha na Eagle Beach manera supervisor, coordinador di Deporte Acuatico. Sr. Van Vugt ta comenta cu specificamente den un area na Eagle Beach, ta parce cu a cuminsa bira tradicion di laga sushi benta eynan tur fin di siman.
”Pa minimo 20 aña n’ey caba mi ta trahando na Eagle Beach anto mi ta haya cu e situacion di sushi a bira di mas. Antes bo ta haya hende cu tabata bay bek cu nan sushi, awo despues di trip atardi, anochi of marduga mes tin hende ta gewoon laga tur tipo di cos benta tur caminda” , sr. Van Vugt ta conta Bon Dia.
Sr. Van Vugt ta sigui splica cu e situacion ta en berdad mustra cu no ta bay bira miho y cu bo ta ripara ta ki sorto di grupo di hende ta esunnan responsabel. ”Mi no tin nada contra bebe, pasa dushi y disfruta di bida, pero e resultado cu bo ta lanta pa mira e siguiente mainta no ta aceptabel. Casi tur mainta ta mesun storia. Tin 3 bari di sushi eynan mes y sinembargo ta tira sushi abao!”
Hende local mester cuminsa tuma responsabilidad
sr. Van Vugt ta bisa cu den su opinion, tin 2 grupo local; bo tin e Rubiano y e grupo ‘multi cultural’, pues esnan di tur diferente parti di mundo, sinembargo e problema ta bin di e combinacion di tur dos grupo. ”Bo no por bisa cada rato cu ta hende stranhero cu ta biba aki na Aruba ta esun nan causando e problema aki, e local ta haci mesun cos te hasta pio tin biaha”
sr. Van Vugt ta bisa.
sr. Van Vugt ta agrega cu tin biaha bo ta mira grupo di hende ta sinta den e area ainda for di madruga te 8’or ta bebe. No tin ningun borchi den e area tampoco cu ta indica cu bo no mag di laga sushi benta. sr. Van Vugt tin un pagina riba Facebook cu yama ”Lex A Taha” , caminda e ta uza e influencia di media pa purba inspira hende su pensamento riba topico nan manera esaki.
Kisas mester cuminsa parti boet
Segun sr. Van Vugt, Eagle Beach, ni ningun di nos otro beachnan no ta un dump y a yega ora pa cuminsa presta mas atencion riba esaki. ”Mi ta kere si cuminsa pone borchi y en general cuminsa pone mas atencion, cu bo sa, manera pa sikiera indica unda e bari sushi. Aworaki porta nan no ta ni wak cu tin bari sushi eybanda , aunke cu e ta visibel si, pero si bo tin un borchi of algo cu ta indica bo cu ta bisa si bo laga un sushi atras bo por haya boet. Asina ki kisas bo por spierta hende mas lihe cu nan ta reacciona pa evita di haya problema”.
Chef van Dienst Strandpolitie, Alex Boekhoudt ta splica Bon Dia cu en general no mag di
tira sushi ningun caminda na Aruba anto si bo wordo gara ta haci esaki, depende na kico bo a tira y na unda bo lo haya un boet. sr. Boekhoudt ta splica cu e situacion di tiramento di sushi na Eagle Beach ta producto di hende cu ta fiesta pero bo nunca sa ta ken a haci esaki pasobra semper tin diferente hende. ”Nos no a haya keho directamente di esaki pero nos mes ta wak paso nos ta core patruya. Nos tin un cooperacion cu e instancia nan concerni cu ta haci nan best pa yuda piki sushi tur dia den e tipo di area nan aki.” sr. Boekhoudt ta bisa.
Sr. Boekhoudt ta agrega cu normalmente ora cu Polis haya un aviso asina, por ehempel ora tin bestia morto cu a wordo tira na beach, tin un departamento special cu ta recoge nan. ”Mi no sa si D.O.W. nunca a pensa riba esaki, pasobra poniendo borchi riba caminda publico ta particularmente cay bao di D.O.W. Pero atrobe, e regla normal ta pa no laga ningun sushi atras y no tira sushi ningun caminda pasobra asina ki logicamente no lo tin asina hopi problema pa nos ni medio ambiente”
