Fiscal a exigi 25 aña pa ambos sospechoso Steve Fan y Jefferson Echobardo den caso di tiramento fatal di Sasha na su cas na Wayaca. 23 di maart hues lo duna su sentencia.

Ayera e dos sospechosonan Fan y Echobardo a presenta dilanti hues pa finalmente e tratamento di e caso cual a tuma luga na september 2016.
E famia di e victima cu a fayece por medio di un tiro na cabes, a bini corte cu T-shirtnan bisti cu e palabranan ‘Husticia pa Shasha’ y ‘Stop Criminalidad’.
Hues a puntra sospechoso Echobardo kico ta su envolvimento den e caso aki y di ki manera e ta envolvi of no. Sr. Echobardo a admiti culpabilidad di su actonan y declara cu inicialmente e intencion tabata ta pa djis comete un atraco. El a declara tambe cu tur cos tabata idea di sr. Fan anto e intencion nunca tabata ta pa tira ningun hende of comete asesinato.

“Stevie a bisa mi cu semper su tanchi ta cana cu 10 mil florin den su tas pues e ta un easy target”, sr. Echobardo a bisa. E ta bisa cu sr. Fan semper a yud’e cu hopi cos y semper tabata un bon amigo pe. Sr. Fan ta sobrino di e victima anto e tin su negoshi di distribui ijs (Stevie Ice Factory). Segun sr. Echobardo, sr. Fan tabata tin mester di extra placa pa paga pa impuesto di algun ekipo pa su negoshi. Sr. Fan a yega di fia sr. Echobardo placa cu ainda e tabata deb’e. Pues e la sinti su mes ‘obliga’ pa yuda sr. Fan comete atraco na cas di su famia.

El a bisa cu sr. Fan a dun’e placa pa cumpra un arma di candela. Sr. Echobardo mester a pone e resto di placa cual e la inventa un storia na su ruman muhe pa por presta e resto pa bay cumpra e arma.

Nan a haya e arma sin municion, pues nan a regresa pa busca esaki cerca esun cu a bende nan. Akinan fiscal a puntra si e intencion no tabata pa comete asesinato, pa kico ora cu a haya arma bashi nan a bay bek busca bala pa esaki. Sospechoso Echobardo ta declara cu tabata pa motibonan di prevencion si e lo mester a wordo ataca pa e yiu homber. Pasobra nan por a djis spanta e mama y tata cu ta hende di edad caba, tuma e placa y bay.

Kico a bay robes
Sr. Echobardo ta bisa cu na prome instante e no tabata di acuerdo pa haci esaki pero ‘no tabata tin otro opcion’. Fiscal ta puntra pa kico netamente mester a bay cas di famia di sr. Fan. Esaki tabata pasobra sr. Fan mes a insisti cu esaki lo ta miho y rapido, segun Echobardo. El a drenta e cas unda cu solamente e Shasha y su casa tabata t’ey.

E casa a resisti y tabata tin un medio confrontacion entre nan. Sr. Echobardo basicamente a perde control di e situacion. E yiu homber di e victima a bin e cas e momento ey y topa cu ne. Akinan e yiu homber a haya su mes ta core pa su bida tambe. Sr. Echobardo ta bisa cu el a bay den panico pasobra e no tabata kier a wordo gara pa otro hende. Na momento cu el a cuminsa core bay pa sali for di e cas, el a ripara cu el a laga su tas atras. El a bira bek pa gara su tas, anto mester a tira direccion di un bentana cu su arma di candela pa purba habri un porta. Pero ta akinan e bala a alcansa Shasha na su cabes pasobra e tabata scondi tras di e porta aki, segun sr. Echobardo.

Fiscal no a kere mucho e parti aki. E ta bisa cu si e sospechoso mester a kibra un bentana pa habri un porta, e no tabata tin necesidad di tira. Aparentemente nunca sr. Echobardo a yega di uza un arma y ta bisa e dia ey el a tira pa prome biaha den su bida. Ambos biaha cu el a tira tabata pa motibo cu el a bay den shock segun e ta bisa.

‘ Mi lo muri cu mi inocencia’
“Mi no tabata tin ningun motibo pa ta hinca den esaki. Mi no mester di placa, mi ta inocente y lo muri cu mi inocencia”, sr. Fan a declara den corte. Na ningun momento Bon Dia por a tuma nota cu el a pidi disculpa na e famia, tampoco ora a yega su ora di duna su ultimo declaracion. Sinembargo el a bisa cu e ta lamenta cu su famia ta husga su persona di e forma aki mirando cu nan tambe tin un ‘cara hopi sushi.’ Esaki tabata un ofensa grandi pa e yiu homber di e victima cu mester a sali un rato for di sala na e momentonan ey.

Pa basta tempo caba tin algun problema entre e famia di sr. Fan cu su primonan; problemanan familiar riba ‘cosnan loco’ cu no tin sentido segun yiu muhe di e victima ta bisa. Fiscal a puntra sr. Fan cu si en berdad e no tabata envolvi, pa kico e no a bay autoridadnan ora a haya sa cu sr. Echobardo a tira atraco na cas di su famia anto a yam’e pa sr. Fan mes pasa busk’e. “Mi tabata bao menasa sra. hues. Jeff a menasa mi cu arma. Mi no tabata kier mas morto cay.” Abogado den defensa di sr. Fan ta bisa cu no ta probabel cu su cliente ta hinca den e cos aki pasobra ta sr. Echobardo tabata mester di placa pa paga sr. Fan bek.

Declaracion di famia
E yiu muhe di e victima a declara den corte riba nan experiencia di e caso y e impacto riba nan bida. “Mas tristo ta cu nos mester biba realidad cu el a sosode na cas di nos mayornan. Ta algo dificil pa lubida haya bo mama morto na cas. Ta kibra recuerdonan bunita cu nos tabata tin cu otro na cas.” El a sigui bisa cu pa biba un bida normal te cu awe ta hopi dificil. El a bisa cu ta parce cu sr. Fan no ta mucho preocupa y ta mustra calma despues di e entiero, mas cos cu ta ‘shock y duna nan berguensa’. E famia ta exigi e castigo di mas halto pa ambos sospechoso, pasobra nan ta haya cu si ta asina cu un a planifica, anto e otro a ehecuta e acto criminal, esaki no ta haci ningun diferencia.