Weekend di celebracion di Pasco ta den porta y esaki ta trece cune no solamente alegria y tempo den famia, pero tambe cuminda dushi. Dietista di Alimenta Diatetics & Health Promotion, Srta. Charlene Leslie ta duna algun tips pa tene den mente durante e dianan di celebracion na momento di disfruta e diferente tipo di cumindanan dushi cu ta tradicional pa e temporada di fin di aña.

Hopi biaha durante dianan di fiesta no ta solamente cu tin cumindanan diferente, ayaca, ham di Pasco, pan de jamon, ponche crema, bebidanan etc. Pero ta tambe cu hopi biaha den e temporada aki mayoria di hende ta come den cantidadnan mas halto compara cu normalmente.

Srta. Leslie ta splica cu generalmente si ariba Noche Buena of dia di Pasco e cantidad di cuminda ta mas compara cu normal, esey hopi biaha no ta un problema mucho grandi y no lo tin necesariamente un efecto grandi ariba e salud of peso di un persona. Pero e problema cu hopi biaha ta bin dilanti, el a sigui splica, ta cu ta full e temporada di e dianan di fiesta, no solamente dia 24 of dia 25, e cantidad di cuminda ta aumenta.

“Nos ta cuminsa for di mita december caba cu tur e kerst dinnernan, e ayacanan na cas, ponche crema den frigidaire, dus e ora tur dia bo ta pick un tiki mas y come den cantidadnan mas halto e productonan diferente compara cu locual bo ta come normalmente. Combina cu esey tambe ta cu nos ta haci menos actividad fisico y e combinacion di e dosnan ey pa simannan largo si por tin un efecto grandi riba bo peso y bo salud”, Leslie a agrega.

Un tips cu Srta. Leslie ta duna ta pa ta consciente kico bo ta haciendo y pa planea bo dia segun tur e actividadnan cu tin ariba schedule.

“Si bo sa cu durante dianan di fiesta bo tin cu bishita cinco famia por ehempel y bosa cu na tur famia nan ta bay tin cuminda y bebida etc. bo por planea bo dia. Si bo sa cu na un famia ta bay tin cuminda grandi e ora bo ta bay merdia of anochi eynan y esey ta bira bo cuminda grandi. Porta si bo bay cerca otro famia zorg pa bisa nan adelanta cu bo no mester come hopi djis un tayo chikito ta okay. E conclusion ta cu nos mester midi nos mes y planea tambe kico precies nos ta bay haci y den ki cantidadnan”, el a indica.

El a sigui splica cu un ayaca mediano ta 570 caloria caba, cual ta casi mesun hopi cu un cuminda completo na caloria. Si esey ta un appetizer y despues di esey ta bin un tayo cu ham di Pasco, calacuna y tur e sausnan y carbohidratonan, e calorianan ta bay ta hopi halto cual no ta ideal. En cambio, Leslie ta bisa, come un ayaca como cuminda completo a hopi mas miho y e calorianan no lo bay ta di mas halto.

Otro tips y uno cu Leslie ta enfatisa ta pa no lubida ariba actividad fisico. Manera el a menciona caba, durante dianan di fiesta hopi hende tin e tendencia di haci menos actividad fisico, mientras cu den su opinion e dianan liber ta eigenlijk e momento perfecto pa haci mas actividad cu famia. Por ehempel bay hike mainta riba e di dos dia di Pasco of bay lama un rato. “Bo ta cu famia y bo ta haciendo lago activo y e ta yuda tambe tene e balansa mas miho”, el a bisa.

Por ultimo Leslie ta comenta cu hopi biaha hopi hende ta gusta haci resolucion y ta warda aña bolter pa cuminsa cu un estilo di bida saludabel, pero eynan e ta bisa pakico warda te januari. “Pakico bo no por haciele awe mes of mañan? Mas importante ta cualkier cos cu bo haci, si ta awe of si ta na januari of na februari, ki tempo cu bo kier haciele, wak pa nan ta cambionan chikito y sostenibel”, el a indica.