Diabierna ultimo, temporada di tiramento di klapchi a cuminsa oficialmente. Aunke esaki ta un tradicion cu ta trece alegria, ta importante pa tene cuenta cu algun tips valioso pa mantene esnan vulnerabel sigur na momento di tira klapchi.

Tiramento di klapchi ta un tradicion cu ta ser comparti den famia, pero ta un hecho cu klapchi ta keda algo peligroso, specialmente pa mucha; mas ainda si nan no tin supervision di nan mayornan na momento di tira klapchi, y tambe por ta peligroso pa mascotanan na cas y otro animalnan riba caya.

Pa e motibo aki Bon Dia Aruba ta pone enfasis riba algun tips importante pa tene den mente na momento di tira klapchi pa seguridad di mucha- y mascotanan.

Algun di e tips importante aki ta pa mantene klapchi fuera di alcance di muchanan chikito. Como mayornan ta importante pa ta consciente y no tira klapchi dilanti di mucha chikito, tampoco laga un mucha chikito tira klapchi y no laga e muchanan chikito bay den e huma toxico di klapchi.

Si e muchanan tin un edad un poco mas avansa y ta desea di tira klapchi, ta hopi importante pa un adulto semper keda supervisa nan. Mayornan por traha regla y percura pa e muchanan cumpli cu esaki na momento di tira klapchi. Proteha e horeanan di e muchanan cu earplugs pa e zonidonan fuerte di klapchi no daña nan oido y tambe ta bon pa tene un hemchi cu awa cerca ora cu ta tira klapchi.

Aunke temporada di klapchi ta un temporada cu hende ta disfruta, tiramento di klapchi ta menos dushi pa e mascotanan. Klapchi tin consecuencia grave pa e mascotanan. Expertonan ta sigura cu e zonido di klapchi ta cuater biaha mas duro pa cacho y e ta 10 biaha mas duro pa pushi.

Animalitonan no ta necesariamente scucha zonido mas duro, pero nan ta tende mas skerpi y nan ta tende mas leu cu hende. Nan por tende hasta e klapchi cu ta wordo tira den e un otro bario, cu por ta pa un persona no ta asina duidelijk, pero pa e bestianan e ta zona cla.

E zonido di e klapchinan por causa trauma cerca e mascota. Pa un bestia, e trauma no ta djis un anochi, e por keda cu efecto di e stress cu por causa cu e ta keda cu miedo pa zonidonan duro pa hopi tempo.

Un di e tips mas importante pa doñonan di bestia ta pa tene e mascotanan paden di cas, esey ta miho solucion pa e dianan cu tin kimamento klapchi, specialmente pa dia 31 di december anochi. Durante e dianan aki hopi bestia ta perde, vooral cacho, pasobra nan ta spanta y nan ta core bay.

P’esey tambe ta importante pa doñonan di mascota tin nan mascota microchipped. Den un caso cu e mascota sali huy for di cas pa motibo di miedo, e microchip ta un manera eficiente y facil pa logra haya e mascota back. Si e mascota no ta microchipped, bisti’e su banchi cu number di telefon y nomber di e doño.

Ta importante pa e mascota haya suficiente oportunidad den dia pa haci su necesidadnan pa asina anochi e mascota por keda full paden sin tin mester di sali.

Otro tip importante ta cu si un doño di mascota tene nan bestia paden, ta bon pa pone cierto distraccion pa e mascota. Por ehemplo cera cortina, cende radio y/of television.

Ta importante pa e mascota haya suficiente oportunidad den dia pa haci su necesidadnan pa asina anochi e mascota por keda full paden sin tin mester di sali.

Den e temporada aki tambe hopi hende ta prefera di bay den e direccion di medicamento pa trankilisa nan mascotanan, pero no semper esaki ta un bon idea. Tin hende ta cumpra pildo trankilisante na veterinario, pero no ta tur bestia ta sali bon cune y e medicamento por perhudica e mascota, den sentido cu e ta verdoof nan, pero e zonido mes ta keda activo. E medicamento por paralisa nan, pero e zonido ta keda toch fuerte y esey ta pone cu tin bestia ta bira mas nervioso.

Si un persona ta desea di duna nan mascota un medicamento asina, ta hopi importante pa busca mas informacion cerca un veterinario prome cu tuma e stap aki, sea ta pildo of algo mas natural.

Un mascota ta custuma cu su doño of cu su famia na cas. P’esey e ta menos stress pa e mascotanan ora cu tin hende na cas durante e temporada di hopi stress pa nan, pasobra nan ta sinti e presencia di nan doño of di hende. Nan ta mas trankil y nan ta relax un poco mas, pasobra nan ta sinti e compania na cas.

Por ultimo, un tips importante na e automobilistanan pa nan tambe tene cuenta cu tin hopi mascota cu ta spanta y ta sali core bay ariba caminda. P’esey ta importante pa automobilistanan pone toch un tiki mas atencion riba caminda den e dianan aki, ya cu hopi bestia cu ta sali core bay den panico cu por sufri door cu automobilistanan no ta mira nan. Ta importante pa core na un velocidad mas slow unda por tene cuenta cu animalitonan cu ta core crusa caminda diripiente, y ta mas alerta pa mascota riba caminda.