Despues un caso a base di e Algemene Politie Verordening na 2011 contra un dump ilegal na Aruba, Ministerio Publico (OM) a bin cu un maneho contra dump di sushi ilegal. Sinembargo e dump di Tamarijn ta mustra cu OM no ta actua riba e maneho aki.
Na 2012 hunto cu otro instancianan di gobierno a yega na un maneho. Un rol importante tambe ta den man di e parti administrativo (gobierno), unda a lanta City Inspector. E keho den e organisacion aki pa basta tempo ta cu e inspectornan (no di polis, pero administrativo) no por actua pasobra nan no tin autoridad. Esaki gobierno no a regla ainda. Sinembargo nan por actua den sentido cu nan por pidi ayudo di polis ora por ehempel tin un caso manera Tamarijn.
Polis tambe tin instrumentonan, mescos cu OM. Punto ta cu, manera Bon Dia Aruba a atende den varios otro casonan manera esun di WEB, dump ilegal di asbest riba tereno di refineria na San Nicolas y dump di Parkietenbos, nan no kier actua. Mientrastanto ta priminti, den e caso por ehempel di Parkietenbos, e habitantenan cu lo bay atende cu e molester, peliger pa salud etc. Den e caso di Parkietenbos habitantenan recientemente a entrega nan dossier cerca recherche pero esaki a resulta na nada te awor.
Den e caso di dump ilegal di asbest riba tereno di refineria, polis a nenga di tuma e denuncia di un habitante, cual tabata contra ley. OM tampoco ta reconoce su autoridad pa actua den e caso aki y te awor ta nenga pa duna ordo na polis pa haci investigacion. Aunke actividadnan ilegal a tuma luga riba e tereno cu consecuencia negativo pa e salud di e habitantenan.
Den e caso di Tamarijn brandweer a declara den nos edicion di ayera cu e doño di e tereno ta responsabel pa e gastonan. Pero te awor Bon Dia Aruba no a haya informacion cu e cadena di husticia ni e cadena administrativo (gobierno) realmente a actua contra e doño. Pa asina no preveni cu lo bin candela atrobe pero tambe molester en general y fors’e pa limpia e luga den un forma responsabel y cu menos efecto posibel pa medio ambiente.
E potret hunto cu e articulo aki ta un screenshot di e website di Ministerio Publico unda ta papia di e intencion di bin cu un maneho di actua (handhavingsplan) pa medio ambiente. Na 2012 OM a informa cu nan tabata asina leu cu nan lo por actua contra entre otro doñonan di dumpnan ilegal sea unda ta constata iregulidad den e caso nan tin un permiso.
