Tin un preocupacion grandi den e sector di salud pa e casonan di rash y keintura. Departamento di Salud ta advertiendo hende riba e rash pero no ta menciona cu tin mas o menos 700 caso sospechoso di Zika y casi 30 pos cu sangura cu ta transmiti Zika.
Awe e cadena cu entro otro GKMB, Departamento di Salud y otro instancianan di gobierno ta sinta hunto pa analisa e situacion. Aruba, compara siguramente cu Corsou, semper tabata miho den prevencion y combatimento di e malesanan contagioso cual e sangura Aedes Aegypti ta plama.
Sinembargo despues di e ultimo yobida e cadena a keda hopi keto riba e situacion y tambe e cantidad di casonan di Dengue, Chikungunya y Zika. Na Corsou ta conoci cu pa basta luna tin un problema grandi cu Zika.
Dos muhe na estado cu Zika
E malesa aki no tin mucho efecto riba e pashent manera Dengue, pero pa muhenan na estado e virus ta hopi mas grave. Como cu nan baby por nace cu un deficiencia celebral (microcefalie) unda e baby ta nace cu un celebro mas chikito y su desaroyo ta keda hopi atras. Bon Dia Aruba por compronde cu desde januari ya tin 2 casonan confirma di muhenan na estado cu tin Zika.
For di december tabatin señalnan for di e sector medico den e siguiente lunanan e situacion di Zika por a bay for di man na Aruba tambe. Sinembargo Departamento di Salud (DVG) no a alerta publico manera di custumber, pa asina nan por cuminsa tuma medidanan pa preveni y proteha nan mes.
Epidemia
Desde un par di siman por papia di un epidemia na Aruba. Casi sigur tin 400 casonan di Zika di e 700 casonan sospechoso. Sinembargo ta falta ainda test pa determina si 100% tur caso ta trata di Zika of si tin Dengue tambe entre di nan. Bon Dia Aruba a acerca GKMB, e instancia di gobierno encarga cu e prevencion y tambe fumigacion di barionan, pa haya mas informacion. Clayton Croes di GKMB ta bisa nos ayera cu awe nan ta reuni over di esaki y e no por duna mas detaye. “Nos mes mester haya informacion di Departamento di Salud. Locual si nos ta ripara cu tin mas caso.” Pero como cu Zika relativamente ta un ‘novedad’ pa nan, nan mester wak con nan ta anda cu ne. “Awor ta analisando e datonan tambe.”
Bon Dia Aruba ta constata cu epidemia di Dengue den e ultimo añanan GKMB hunto cu e otro instancianan manera Departamento di Salud tabata hopi mas activo pa cu fumigacion, alerta pueblo y duna informacion di e desaroyonan. Pa motibo di esey nos lo dirigi nos preguntanan na e instancianan concerni riba entre otro: Dicon a alerta pa rash y no Zika? Dicon no a tuma señalnan for di e sector medico na serio mas trempan pa tuma accion mas lihe?
