“Tin situacion di desconexion den comunidad”, asina parlamentario Setty Yarzagaray (MEP) a declara . E desconexion aki ta na nivel casi general, desconexion cu hende, famia y te hasta cu Dios of ser creador depende di cada hende su creencia, segun e parlamentario.
E ta haya cu ta importante cu e conexion t’ey bek pa asina evita casonan cu a conmove nos comunidad manera e dos muchanan asesina. E ta haya c u esaki ta un forma pa bin cu miho solucionnan den e problema social cu nos tin.
E rol di por reestablece e conexion aki den tur bario y parokia ta hopi importante. “Mas comunicacion cu tin y mas contacto tin, mas nos por haya sa pa locual nan mes ta indica den esaki.”
E ta puntra su mes no solamente como parlamentario sino como persona: Con ami por yuda pa conecta cierto cos bek? Pa asina aki percura pa yena e bashi di e situacion di desconexion aki. E ta kere cu nan mes como politico mester ta mas activo pa realisa trabou boluntario. Esaki ta e prome paso cu e ta haya cu nan como politico mester haci, den caso cu nan no ta haciendo esaki caba.
E ta convenci cu trabou boluntario por yuda pasobra e no ta kere cu e bashi den nos comunidad ta material of monetario so. “Tin bashi hopi mas grandi den un persona cu por haci cu acto asina ta wordo cometi.”
El a trece e pensamento aki como un reflexion caminda nos comunidad pa pasa den un siman duro den cuadro di e dia di luto decreta pa e abuso y morto di e dos muchanan. Pues un reflexion ta: Con cada un por yuda den drecha situacionnan cu nos tin actualmente den nos comunidad. E mester ta solucion di un forma duradero.
