Quota Club mes ta organisa eventonan pa cu conscientisa cuido di oido henter aña. Nan ta bishita scolnan pa asina papia cu muchanan. Durante e charlanan na scol nan ta siña e muchanan e importancia pa cuida no solamente nan oido pero tambe cu e muchanan por conscientisa adultonan. Nan ta busca diferente manera pa conscientisa personanan pa cuida nan oido, pero no ta solamente esey nan ta percura. Tin recomendacion pa cuanto e decibel porta, pero esaki ainda no a wordo trata.
Aparte cu nan tin actividadnan hopi grandi, nan tin hopi actividad di servicio, examina horea. Esaki ta pone cu nan tin cu parti e aña un tiki. Nan tin cierto momento grandi pa trata e parti di oido, di otro banda nan ta dedica na e parti social di pueblo, e president di Quota Club Sra. Muzaninn Wever a bisa Bon Dia Aruba.
Pa loke ta e zonido durante carnaval a pidi pa mantene e zonido na cierto decibel, den e caso esaki ta 95. Pero durante otro eventonan no tin un exigencia pa con duro e zonido mester ta. Pero segun Sra. Wever, loke cu tin aworaki ta recomendacionnan di cuanto decibel zonidonan por ta. Pero no tin un ley cu actualmente cuanto e decibel e zonido mester ta, niun hende por wordo obliga pa mantene nan mes na cierto decibel. A puntra Sra. Wever si ta bon pa bin cu un ley cu ta obliga e organisadonan pa mantene e zonido na cierto decibel. “Naturalmente ora cu bo no ta haci algo boluntariamente despues cu tin hopi recomendacion, e ora e siguiente stap ta e forsa di ley,” el a bisa Bon Dia Aruba.
Papia cu minister
A puntra si nan a acerca minister riba e asunto aki pa asina yega na un solucion, pero tambe si a sinta cu departamento di Salubridad Publico. Pa hopi aña caba Quota Club tin den e buskeda pa bin cu un forsa pa baha e decibel pa comunidad. Esaki ta un proyecto di hopi aña caba y nan ta compronde cu tin un proposicion pa un ley, pero esaki no a yega parlamento ainda of ta na e departamento di legislacion pa wordo presente.
Bon cooperacion
E cantidad di hende cu ta birando sordo ta creciendo, y pa cu esaki Quota Club ta percura pa traha hopi cerca cu e fundacion FEPO. “Quota tin un bon cooperacion cu nan. Tur ora cu nos pidi nan pa asistencia, nan t’ey pa yuda Quota y Quota t’ey pa nan tambe,” Sra. Wever a indica. Tur ora nan ta traha hunto. Durante e evento di “Shatter Silence Week” nan ta ricibi un bon cooperacion di FEPO. E fundacion ta carga e evento mientras cu Quota ta percura pa duna e asistencia cu mester. “Nos no por keha di un cooperacion asina,” segun e president na Bon Dia Aruba.
Educa muchanan
A puntra Quota Club si nan tin bista hunto cu FEPO si e problema ta mas grandi den mucha, hoben of hendenan grandi. Nan ta kere cu mucha ta siña di adulto. Hopi biaha por mira si e adulto ta bisa e mucha pa haci uzo di earplug, tin biaha mester forsa e mucha pa haci uzo di esaki. P’esey nan kier trata di drenta den e scolnan, educa e muchanan. Asina aki e muchanan tambe por educa e mayornan. Tin biaha mester draai om e situacion, pasobra si e mayornan no tin informacion, nan no sa of mayornan ta bon pasobra tempo cu e tabata chikito a scucha musica duro y nada a pasa, pero djis pasobra nada a pasa kiermen e no por pasa.
Djis pasobra un adulto a scucha e musica duro ora cu e tabata chikito, por ta e no ta ripara cu e horea, e oido a bay atras. Pa e motibo ey nan ta trata di dirigi nan campañanan na e adulto, pero pa algun añanan caba nan ta atendiendo esaki na scol cu e muchanan. Esaki ta pa e muchanan tambe di nan banda tuma e iniciativa pa bisa e mayornan cu nan kier e earplugs.
