Tin pensa pone casnan di Colony den man di fundacion; Habitantenan cu no ta cumpliendo mester bandona propiedad di gobierno

Director d di DIP, Jaime Croes a referi na e situacion di casnan propiedad di gobierno na Colony. Nan ta un cantidad di 120 cas propiedad di gobierno, y di nan tin 40 cas di hendenan cu sigur no ta cumpliendo debidamente cu reglanan.

El a bisa cu nan a haci un investigacion a base di 20 caso, cu a mustra, entre otro, cu nan a haya hendenan sin contract. Otro cu tin contract pero no a paga. Otro tin yabi pero no tin contract. Te hasta tin hendenan cu no tin niun papel bibando den e casnan aki. Pues nan ta diferente tipo di caso specifico. Te hasta tin hende cu tin negoshi di real estate cu ta huur propiedad di gobierno na Colony.

E situacion aki ta haci e caso dificil, debi cu tin yen di tipo di caso. Cada un di nan ta hayando carta for di DIP, ya cu gobierno tin un ley pa cumpli cune, segun Croes. Esun cu no ta cumpli cu e reglanan tin cu sali for di e propiedadnan aki, cu gobierno tin pensa di pone den man di un fundacion. El a bisa cu a pasa añanan cu ‘niun hende a coy e toro na su cacho.’

Segun Croes, esaki no ta un tarea dushi, pero nan mester cumpli cu regla y cu gobierno su maneho. E tabata masha cla pa bisa cu gobierno tin un maneho dirigi pa administra su casnan na Colony. Pues si e persona tin un contract, e tin cu cumpli cune, y si e persona no ta cumpli cune, e tin cu bay. Nan ta un grupo di mas cu 40 hende cu no ta cumpliendo cu e contact of reglanan.

El a declara cu cada un di e hendenan aki ta hayando carta cu un deadline. Algun mester entrega na october y otro cu mester sali di biaha, pero esaki ta depende di cada caso particular. Encuanto si tin algun alternativa pa nan, Croes a bisa cu nan mester cumpli cu nan pago, ya cu tin algun di nan cu tin hasta 8 aña sin paga. E debe cu mayoria di nan tin ta alrededor di 40 mil florin bay ariba, te hasta tin hende cu un debe di 250 mil florin. Despues cu nan paga lo evalua cada situacion particular.