WEB mes a causa confusion innecesario
E topico di siman tabata sin duda e noticia cu WEB Aruba NV mes a trece den aire tocante e usuarionan cu lo tabatin pago atrasa. Loke a haci impacto ta e cantidad di 12.000 cliente cu lo tabata debe ainda. E fantasma di cortamento di awa masal na tanto adres asina a haci cu di diferente banda critica y pregunta a cuminsa bin, te hasta for di Hulanda unda parlamentario Bosman a haci pregunta na ministro Plasterk kico e ta pensa di e aparente caos cu lo ta reina na e empresa estatal aki.
A primera bista un persona lo pensa, ta kico Hulanda tin di haci cu e asunto aki. Esaki si ta parce un asunto netamente interno di Aruba, aki si nos ta autonomo. Laga Bosman bay deal cu e problemanan cu nan tin cu desorden di Nederlandse Spoorwegen, of e corupcion den e mundo di e entidadnan di vivienda popular, unda hasta tabatin uno cu a cumpra un Maserati nobis, nobis di placa di e corporacion. Berdad esey por ta e caso, pero sinembargo su interes no ta completamente straño. No mester lubida cu e prestamo grandi cu WEB a yega di haya, unda Nederlandse InvesteringsBank (NIB) tabata envolvi, ta haci cu e movemento institucional di WEB ta haya cierto atencion na Hulanda.
Awor, analisando e caso mas di acerca, por ta cu e asunto no ta asina serio, den e sentido cu ta trata di un gran cantidad di caso, unda e placa efectivamente a drenta, solamente e problema ta cu WEB no sa ta ken a paga y ken no. Ta bin resulta cu tur e problema tabata un sistema di administracion cu no ta bon liga cu esun di Elmar a causa e problema aki. Ban spera y supone cu esey ta asina y cu tempo henter e asunto aki por keda resolvi. Asina mes, sin embargo, ta keda algun pregunta ta pakico nos mester a haya nos confronta cu un asunto bochornoso asina.
Pregunta: tabata necesario pa trece e asunto dilanti manera un advertencia serio na un grupo grandi cu a ser pinta como mal pagado, mientras cu tur cos ta mustra riba un problema interno administrativo, cu ta responsabilidad di esunnan cu ta maneha e empresa? Ta asina fuerte e cultura di empresa estatal na WEB ta ainda cu, awor cu nan ta un empresa priva, keto bay ta kere cu nan por dirigi palabra na e cliente di e manera aki?
Lo no tabata na su luga pa sali di biaha cu e informacion completo, admitiendo cu tin un problema cu no por aloca e pagonan y liga nan na un cierto persona of empresa cu a paga su cuenta debidamente? Lo no tabata normal cu, en bes di e tono menasante, lo a opta pa puntra e cliente encarecidamente pa colabora cu e empresa pa por detecta ta ken a paga y cuanto, pa despues traha un lista nobo di esunnan cu berdaderamente no a paga? Mester manda hende bay studia ‘rocket science’ pa nan por pensa un manera di traha asina? Of e afan pa tapa e asunto a haci cu mita informacion a sali prome, keriendo cu esey ta ‘bon bastante’ pa e consumidor cu sinembargo no ta pone tino riba e cosnan aki y ta dispuesto di guli tur cos, manera a guli e asunto di ‘hedging’ cu keto bay ta pisa riba stoma di hopi hende den e pais aki?
Y ainda nos no a toca e otro temanan pisa cu ta entre otro e asunto di e tuberia cu ta bay di e empresa priva cu ta procesa desperdicio, cu aparentemente a ser financia ‘out of pocket’ pa WEB (lesa: anos, atrobe). Awor ta WEB a cera aña 2014 cu un perdida considerabel, cu ta resultado entre otro di e gasto grandi aki, fuera di e gastonan excesivo di e heavy fuel oil cu nos ta pagando. Anto ainda nos no a papia di e financiamento cu lo tin pensa pa WEB bay carga pa por tin un sistema di contension (buffer) ora cu, y si e parke di molina na Urirama bira realidad.
Ta di spera cu tur e aspectonan aki bin dilanti den e debate cu oposicion a pidi na Parlamento y cu, conociendo e manera di opera di e mayoria den Parlamento, posiblemente por tuma luga den di dos mita di otro aña, of mas despues hasta. Pasobra esey ta e tipo y nivel di administracion publico cu nos ta tolera den e pais aki, unda esunnan cu mester mantene cierto seriedad den nan puesto publico no ta haci esey, y hopi biaha cu aprobacion y aplauso di hopi di nos. Loke na momentonan asina nos no ta mira ta cu e practicanan aki ta mustra bunita ora ta trata di bo partido na mando, pero nos tin suficiente experiencia con e complaciencia aki ta bira lamento ora cu e partido cu cual e persona ta simpatisa, mester pasa pa banki di oposicion y ta sufri e mesun trato aki na man di e contrincante. Ki dia nos ta siña?
