A pesar di e pandemia di Coronavirus, clero di Aruba lo percura pa nos creyentenan Catolico por participa di e tradicional celebracion di Misa di Aurora, cuminsando dia 16 di december awor.

Logicamente teniendo na cuenta e reglanan di distanciamento y uso di tapa boca. Locual si nan a cancela mutuamente durante e reunion di clero ta, despues di misa no tin nada. Normalmente tin un sorto di comparti entre e participantenan, pero e aña aki no ta posibel debi na Covid-19.

Misa di Aurora

Vicario di Aruba, pastoor Andres Makowiec, a declara na Bon Dia Aruba cu na Aruba nos lo sigui cu Misa di Aurora den orario custumbra di 5or di mainta di tur aña. E tema celebral di celebracion di Misa di Aurora e aña aki ta ‘Iglesia Domestico,’ segun peticion di Monseñor Secco. Cu e tema aki nos diocesis kier pone atencion riba famia y pa celebra tambe Misa di Aurora den famia.

El a papia recientemente cu Monseñor Secco, caminda nan ta discutiendo na Corsou, si nan ta logra celebra Misa di Aurora, mirando e situacion di Covid, y tambe cu tin toque de queda te cu 4’or y mey madruga. Aunke nan a haya permiso pa nan por celebra 5or di mainta, pero kisas na Corsou nan ta bay celebra Misa di Aurora 5:30 am. Pero na Aruba, pastoor Andres a laga sa cu e celebracion lo ta 5or di mainta den tur nuebe parokia rond di Aruba.

Misa di Aurora ta wordo celebra consecutivamente pa nuebe dia te cu Pasco di Nacemento. E ta un celebracion cu tur aña ta aglomera hopi parokianonan. Sinembargo Vicario di Aruba ta premira cu e aña aki e cantidad di creyente Catolico ta bay baha.

Nan por mira cu den termino general e asistencia di parokianonan pa celebra Santo Eucaristia a baha den tur parokia durante e ultimo lunanan. “Pasobra toch tin hendenan cu tin miedo y no ta bin misa regular manera antes. Asina cu e cantidad sigur lo ta menos,” el a bisa.

Di otro banda nan ta purba di probecha tur espacio cu ta posibel paden y pafo di misa pa asina tin mas chens pa e parokianonan por asisti na Misa di Aurora, teniendo cuenta cu distanciamento social. El a bisa cu e medidanan cu Crisis Team a anuncia pa medio di nos Prome Minister riba e cantidad di hende pa encuentro social y/of familiar, no ta conta pa celebracion di Misa di Aurora. Basta cu nan ta mantene e distanciamento exigi.

Ta asina cu pafo di misa, y esaki ta e caso di misa di Savaneta, caminda por ehempel nan a pone dos test dilanti di e misa pa tin espacio extra. Nan lo pone screen grandi pa e parokianonan por sigui e misa pafo di dje. Tambe nan a organisa algun espacio paden di e misa mes, por ehempel ariba e sitio unda e coro ta, y tambe den e sacristia, entre otro. E intencion tras di esaki ta –segun Vicario di Aruba – pa toch crea mas espacio pa ricibi mas creyente posibel, manteniendo tur regla di higiena di DVG.

E ta kere cu e prome dia di Misa di Aruba lo ta un forma pa evalua con el a bay, y si tur hende por a drenta si of no. Locual si nan a cancela ta e bebemento di koffie, etc. na final di e misa. El a splica cu durante e celebracion di misa tur hende ta bisti tapa boca, pero despues pa bebe koffie, nan mester kita e tapa boca y nan kier evita cu esaki por sucede pa proteccion di tur hende.

“Pero tambe pa evita aglomeracion tur parokia a dicidi di no haci nada, sino misa nada mas,” segun pastoor Andres Makowiec.

Misa virtual

Tambe nan ta bay transmiti tur Misa di Aurora via Facebook. Si e hendenan kier sigui e celebracion di misa via Facebook, nan a palabra pa transmiti cada dia un misa den cada parokia rond di nos isla. Pa asina cada dia nos por wak e celebracion den un parokia diferente. Pero tin parokia tambe cu lo transmiti tur dia. Esunnan cu no por bin misa ta invita pa sigui e misa virtual na cas den famia.

P’esey e aña e tema central di Misa di Aurora ta ‘Iglesia Domestico.” Te hasta Monseñor Secco a propone pa bin cu un sorto di concurso di pesebre. Nan ta bay wak con nan lo bini cu e concurso aki. Nan kier publica via Facebook, Evangelio di dia y oracion di Nobena di Nacemento pa asina duna oportunidad na tur creyente na cas y den famia pa lesa Evangelio y medita riba dje. Pero tambe lesa oracion di Aurora y asina participa di e nobena, aunke bo no ta den misa. “E ta bira un tiki diferente, pero nos kier promove participacion sea na misa presente of sea na misa virtual,” pastor Andres Makowiec a relata ayera.

Temporada di Advent

Na final Vicario di Aruba, pastoor Andres Makowiec, ta haci un yamado pa henter comunidad, manera Huan Bautista: “Prepara caminda pa Señor.”

E religioso ta haya cu den e temporada aki loke ta mas esencial ta pa drecha nos curason y nos interior. Pa nos wak nos estado personal. Pero tambe pa nos mira situacion di nos famianan. E ta haya cu precisamente e fiesta di ayera di Inmaculada Concepcion, caminda parokia di Santa Cruz tabata di fiesta patronal, ta mustra nos Birgen Maria cu un curason puro pa nos ricibi Hesus.

Pastoor Andres su deseo ta pa e celebracion aki no sea uno solamente festivo, y solamente pone atencion pa cosnan cu semper ta caracterisa Pasco, pero mas bien cu den e celebracion aki Hesus por keda central den cada un di nos.

E ta haya e celebracion di Pasco di Nacemento asina importante, pasobra ta nacemento di Cristo. “Dios a stima nos pa bin cerca nos. No solamente pa bin, sino pa salba nos di nos picanan,” el a bisa.