Ta berdad cu ainda tin hopi hende cu tin miedo di e deporte di Crossfit. Asina instructor Jean – Pierre van der Lak ta bisa pero e ta indica cu e deporte no ta trece peliger pa bo curpa of salud, dependiendo na e conocemento di bo instructor y con leu e ta pusha un atleta.

Sr. Van der Lak tin cuater aña practicando e deporte di Crossfit. E ta un instructor na Crossfit A.297 y ta coach pa tres aña caba.  E luga a habri den october 2013 anto nan tin 90 pa 110 cliente actualmente. “E ta bay basta bon, nos ta progresando manera semper. Cada aña nos ta wak un mehoracion den nos cliente como tambe nos como instructor.  Nos a ripara cu nos ta mehorando den coaching cu cada hende nobo cu nos haya.”

E ta splica Bon Dia Aruba cu na comienso e tabata un poco dificil pa motibo cu nan tabata nobo anto a siña for di ‘trial & error’. E instructor ta bisa cu ta hopi importante pa no compara Crossfit na Aruba cu locual bo ta mira riba media. “Esey por ta hopi intimidante. Pero bo mes mester purb’e y wak kico nos ta haci. Tur dia tin un diferente training y prome cu nos cuminsa nos ta pasa over e movecionnan pa bo sa sigur kico bo ta bay haci y kico por spera.  Nos ta haci e hunto como grupo y bo ta wak cu diferente hende ta pone diferente peso si tin peso involucra den e training.” Sr. Van der Lak ta bisa cu den e manera aki nan ta prepara e training pa cada persona individualmente.

Tur deporte por ta peligroso
Hopi hende cu no sa kico e deporte ta realmente encera ta haya miedo di practica esaki e ta comenta. “Tur deporte por ta peligroso. Den e caso aki di Crossfit tambe ta depende di e instructornan. Si nan keda pusha mucho duro of nan no mustra e mecanismo di e movecionnan apropiadamente, esaki por resulta cu heridanan.” Pero nan ta pone hopi atencion na ‘warm up’ prome cu cuminsa anto hopi biaha durante esaki ta inclui e movecionnan cu e training tin aden.

Videonan Online
Locual ta spanta hende ta e videonan online por ehempel unda bara ta cay riba hende y nan ta keda herida ta practica e deporte. Locual ta pasa ta cu mayoria di biaha nan ta haya un ‘pinched nerve’ cual ta sosode ora cu tin hopi presion aplica na un nervio. “Pa locual ta pinched nerve cu e cosnan ey, esey ta pasa hopi den tur sport tambe. Cu ami mes y cu casi tur atleta esaki a yega di pasa. Ta bay tin lesionnan pero ta cosnan cu mas tanto bo lo mester un of dos dia di descanso y no pa ta dos of tres siman out,” segun instructor Van der Lak cu tambe ta bisa cu mayoria di biaha e curpa mes ta adapta na e deporte.

Mester experimenta
Bon Dia Aruba a combersa cu tambe cu sr. Glenn kende ta un instructor di gym na My Fitness Noord. Glenn tin 35 aña den e mundo di fitness training hende.  Bon Dia Aruba a puntra Glenn tocante e tema di Crossfit y si e ta haya cu esaki no ta mucho saludabel pa e curpa. “Tin varios cos pa tur diferente tipo di hende: pues loke por ta bon pa mi, kisas no ta bon pa bo.  E ta depende na kico bo ta buscando pasobra e ta manera un experiment. Bo ta sigui purba te ora cu bo haya algo cu ta pas pa bo.” Segun e, no ta importa ta kico bo ta haci tanten bo ta haciendo algo anto ta contento y confortabel cu esey.

Estilo di bida
Glenn ta bisa cu practicando cualkier tipo di deporte ta manera un estilo di bida. “Bo tin cu haci e parti di bo. Mescos lantando tur mainta trempan pa skeiro bo djente y rutina diario. Bo mester echt kier e, e mester bin for di paden di bo.”

Glenn ta bisa cu bo motivacion pa bo haya e curpa cu bo ta desea ta depende na con hopi bo kier e. “Bo no mester pusha bo mes pasobra ta akinan ta ora bo ta haya problema cu bo curpa y salud. Na final di dia tur cos ta depende di bo anto bo mester evita pa no odia bo mes ora cu bo faya. Nos mesun debilidad ta nos motivacion y kico ta pusha nos pa bay dilanti. Asina ami ta wak e.”