Mas referendum ta na caminda locual ta refleha cu e trahadonan ta sinti nan mes basta insigur. Principalmente den e situacion di instabilidad laboral cu nos ta pasando aden, despues di e impacto economico cu coronavirus crisis a ocasiona na Aruba.
Ta tarea di departamento di Mediador di Gobierno cumpli cu e derecho cu tur trahado tin di busca representacion sindical. Ta asina cu den agenda di e departamento aki tin programa dos referendum proximamente: Aruba Industrial Services (AIS) y ProTec. E prome referendum di AIS, un compania cu ta duna servicio ariba tereno di ekiponan pisa, ta tuma luga diaranson awor for di 3’or atardi te cu 4:30 atardi na sede di oficina di Mediador di Gobierno.
Encuanto e solicitud di referendum di sindicato SEPPA pa e trahadonan di ProTec, ainda mester wordo defini si eventualmente awe tardi e compania ta reconoce e sindicato pa medio di un proces-verbaal, sin mester bay un referendum.
Pontilius a laga sa cu aworaki nan ta pendiente si e compania ta bay firma un documento di reconocimento, locual ta posibel. Pero den caso cu e compania ta persisti di no haci esey, e referendum ta programa pa dia 3 di september awor di 1’or di merdia pa 4’or atardi na sede di oficina di Mediador di Gobierno. Ta trata di un grupo di alrededor di 100 trahado.
El a haci un apelacion pa esunnan cu ta participa den e referendum pa tene cuenta cu e reglanan stipula pa departamento di Salubridad Publico (DVG).
Mediador di Gobierno, Anselmo Pontilius a declara na Bon Dia Aruba cu nan ta hayando aworaki menos tarea di mediacion. A pesar cu nan sa cu tin situacion den sector priva caminda e companianan, trahadonan y algun di e sindicatonan ta den debate ariba con lo continua cu e condicion di trabao y principalmente cu e cuponan di trabao tambe. Pero oficialmente e departamento aki no a haya peticion pa intermedia den algun di nan.
