Den encuentronan cu ‘management team’, ministerio di Infrastructura a pidi informacion riba loke ta trata e terenonan cu ta tanto den discusion durante e ultimo dianan. Specificamente e tereno dilanti di Divi Phoenix di cual nos a publica over di dje ayera. Segun minister di infrastructura, tin hopi cos cu no a bay segun regla pa locual ta otorgamento di tereno den e ultimo tempo na Departamento di Infrastructura Publico (DIP)
Minister di Infrastructura y vice prome minister di Aruba Otmar Oduber (POR) a laga sa cu e tereno na Bubali recientemente den noticia, aparentemente lo tin casi 40% di dje den zona berde. A pidi un conseho riba esaki a pesar cu tin un acuerdo firma caba por medio di e minister di infrastructura anterior cu no a pasa e akte di esaki segun minister Oduber.
“Na e momentonan aki diferente consehonan ta wordo puntra pa por haya mas informacion pasobra manera nos a bisa, si ta asina cu terenonan ta den aspecto di naturalesa y mangelnan riba e propiedadnan aki, definitivamente nos lo mester pidi conseho necesario tanto di DOW como DNM prome cu por continua riba e proceso cu e terenonan aki,” segun e mandatario.
Aruba Birdlife Conservation (ABC) a wordo informa di un otro proyecto cu ta wordo pusha den tur secresia segun e organisacion, pa e area aki di Bubali Wetlands atrobe. Manera nos a publica, esaki ta pues den zona berde y ta un di e 16 areanan cu parlamento a vota pa proteccion. Segun ABC, minister anterior di infrastructura y awor parlamentario den oposicion Benny Sevinger (AVP) cu asistencia di Franklin Abath tabata sa cu e area aki ta den zona berde y toch a move cu ne. Esaki ta e di tres proyecto grandi cu lo causa hopi daño den e area aki cu ta uno hopi importante pa parha manera nos a publica ayera. Bon Dia ta den proceso ainda pa logra haya un reaccion for di entre otro parlamentario Sevinger riba e asunto aki.
ABC ta haci un apelacion na comunidad pa trece cualkier informacion dilanti riba e proyecto aki y cu nan lo protege nan anonimidad si ta necesario. ABC su intencion ta pa bay corte pa stop e proyecto aki pa realisa y mas causa daño innecesario na e area aki di e Bubali Wetlands segun nan ta laga sa.
Tereno na Eagle Beach pa hotel di 800 camber
Minister Oduber a subraya tambe riba un discusion cu tabata tin di un tereno na Eagle Beach caminda aparentemente lo a pidi un cambio (weizigingsbeleid) pa loke ta trata algun tereno na Eagle Beach.
Un tereno a wordo cumpra aparentemente pa construi un hotel caminda cu lo bay tin 800 camber riba esaki, cual a haya un acuerdo (overeenkomst) di parti di e minister di infrastructura anterior segun minister Oduber a declara. “Mi a pidi conseho adicional ariba esaki mirando cu nan no a pasa ainda e aktenan na notaris y mirando cu naturalmente gobierno tin un beleid pa loke ta trata e ‘algemeen belang’ mescos den e caso di terenonan den zona berde caminda cu tin preservacion di nos mangelnan.”
“Den ambos caso a pidi conseho adicional pa haya un bista mas cla riba e discusion cu tin riba e terenonan aki,” minister Oduber a informa prensa ayera.
