Te ainda SVB no a reconcilia e cantidad di persona cu a perde trabou formalmente cu e grupo cu ta ricibi FASE. Asina Edwin Jacobs, Director di SVB a bisa Bon Dia Aruba. SVB a tuma nota cu 2600 trahado a sali di e registro di SVB, pero no a haci un analisis ainda si ta e mesun cantidad aki a ricibi FASE.
Pero locual si ta sigur ta cu tin mas hende cu a ricibi FASE cu a sali di e registro di SVB. “Den FASE tin trahado cu no tabata registra na SVB,” Jacobs a comenta.
Motibo di esaki, ta pasobra hopi di e trahadonan aki tabata traha ‘zwart.’ Den otro palabra, nan no tabata registra y pa un of otro motibo, consciente of inconscientemente no tabata cumpli cu e pago di obligacionnan social.
Esun responsabel pa e situacion aki ta keda e dunadonan di trabou. “Pero e accion contra e dunadonan di trabou aki, cu no a cumpli cu ley, mester keda despues di e crisis di COVID-19,” Jacobs a sigui bisa. “Por lo menos, e dunadonan di trabou cu ta keda existi despues di e pandemia aki.”
Motibo pakico no por haci e control y tuma accion awor aki ta simpel. SVB no tin e capacidad actualmente pa ehecuta e proceso aki, banda di tur locual ta haciendo, cu ta percura tambe pa e loonsubsidie, ademas di e trabounan regular cu ta maneha e seguro di malesa y e fondo di pensioen di biehes.
“Nos enfoke ta completamente riba pago di loonsubsidie y pa MKB (sosten pa negoshi medio y chikito). E capacidad cu tin mester uza unda ta prioridad. Pero nos tin tur e informacion necesario cu ora ta e tempo debido lo por uza. E parti bon ta cu tur informacion ta centra cierto momento na SVB. Lista di FASE, di MKB y di Loonsubsidie tur ta pasa SVB, cu ta pone cu tin tur informacion den cas pa analisa y cu na momento cu ta prudente por actua.”
Pero, Edwin Jacobs a bolbe reitera cu e trabou aki lo sosode despues cu surpasa e crisis di e pandemia.
