Despues di un encuentro cu mayoría di organizacion y empresa activo, o cu intencion di bira activo den procesamento di desperdicio, a bira conoci cu un di e obhetivonan lo ta pa crea otro lugar di almacena desperdicio. Esaki banda di intencion di stimula procesamento y reciclahe di diferente tipo di desperdicio, cu lo por ta base di actividad empresarial den e sector aki. E opcion aki di bay concentra desperdicio na otro lugar ta mustra logico, ya cu ta dificil pa imagina cu ta simplemente sigui trece mas material na Parkietenbos. Aunke ta interesante y alentador pa mira cu tin bastante interes di sector priva pa opera den e actividad aki, esey no ta cambia e hecho cu ta trata di un materia bastante compleho, unda cierto punto basico di salida ta hunga un papel importante.
Un promer punto strategico ta cu di cualkier manera, desperdicio mester bay for di unda e ta, sea pa un lugar final local o den exterior. Tabatin e opcion pa bin cu un incinerator grandi cu lo a maneha localmente mes gran parti di e desperdicio produci. Por conclui cu esey awor lo ta ‘off the table’? No cu nos ta sugeri pa bolbe na e plan ey, al contrario, pero bo no sa nunca… En todo caso, e decision pa pasa mas pronto cu ta posible pa cera e dump actual ta bon, sin cu mester carga speranza cu esey automaticamente ta elimina tur problema pa e habitantenan den vecindario. Hasta si no ta trece mas material na e lugar ey, pa varios aña e sero lo keda genera gas cu por cende, sea espontanemente, sea a proposito. Di tur manera lo mester inverti den medida pa limita escape di gas no controla cu por keda duna problema. Despues lo por bin cu iniciativa pa haci algo sensato cu e sero di sushi. Na otro pais por ehemplo a dicidi di cubri sero similar cu panel solar y a converti esaki den un fuente di energia. Bon Dia Aruba a publica algun tempo pasa tocante un proyecto asina na Hulanda.
E siguiente pregunta lo ta uno clave: unda pa pone un siguiente punto di acumula desperdicio? Y e pregunta relaciona directamente cu esaki ta si ta bay tin si of no, separacion di desperdicio na e origen, na residencia y empresa? Si no tin esaki, ta dificil imagina con e diferente empresanan cu ta specializa den reuni y procesa material specifico, por haci nan trabao? No por djis crea un monton di desperdicio grandi, pa cada ken bin coba aden buscando loke ta interesante pa nan. Optimalizacion di reciclahe y exportacion di cierto material, manera glas, metal, rubber, papel, bateria, material procedente di computer, etc. ta exigi cu mas tanto posible e tipo di material ey no yega na e lugar central mes. Fuera di esey, e creacion di un otro lugar di acumula desperdicio no ta defini ainda kico ta haci cu e material cu ta keda, y cu ta mas apto pa elimina via kimamento. Esaki no ta algo cu necesariamente mester ser haci na Aruba; mester sigui considera e opcion di exporta e desperdicio cu keda despues di separa tur material apto pa reciclahe. Si no, nos lo ta creando otro ‘Parkietenbos’ sin sikiera tin e opcion di un tereno apto pa esey. Y pakico? Tempo cu a crea e dump na Parkietenbos un di e consideracionnan tabata cu riba tera mester tabatin menos molester posible di e lugar, teniendo cuenta cu biento. Ta pesey tambe e otro dump, na Smal (Zeewijk), cu a keda elimina despues, tambe tabata na costa zuid pa holor no bay riba tera. Esaki ta elimina practicamente tur nos isla como candidato, cu excepcion di lugarnan na costa zuid. Pregunta: tin un lugar similar disponible ainda? Esaki, los di e pregunta si di berdad lo mester bay den e rumbo aki.
Un di e lugarnan unda por haci esaki ta riba e actual tereno di e refineria, pero cu e interogante si no tin cos mas adecua pa haci cu e tereno ey. Aki atrobe ta haci falta claridad riba kico ta e proposito cu gobierno tin cu refineria y cu e tereno ey.
Tambe a toca e punto di legislacion necesario. Sin duda algun lo mester bin cu regulacion adecua pa e proceso amplio cu lo mester bay tuma lugar. Sin embargo, ta dificil, casi imposible, pa bin cu legislacion adecua sin cu tin claridad cual ta e actividadnan cu ta bay inicia y apoya. Ta ora tin un plan integral strategico por bin cu ley pa cada subsector specifico, cu ta cuadra cu ley ambiental local, pero tambe cu normanan internacional pa exportacion di cierto material por ehemplo.
Finalmente e aspecto di conscientisacion. E mandatario concerni tin razon cu e aspecto aki ta indispensable y cu mester haci un esfuerzo grandi den esaki, tanto den educacion como den informacion general na comunidad. Pero, conscientisacion ta cay den un bashi, si no tin un cuadro di ley aplicable, y e debido supervision y sancion pa esaki. Aki atrobe nos ta toca e problema general di falta di supervision riba cumplimento di ley, cu ta percurando cu riba hopi tereno no tin supervision debido. Tin un oportunidad aki pa mehora e situacion general aki, pero pa logra mester resolve cierto problema, entre otro di otro dump, unda y con? Claridad riba esey no tin ainda.
