Segun minister di Infrastructura Otmar Oduber (POR), tin hopi reto lamentablemente cu e desaroyo di Green Corridor y Watty Vos Boulevard. Actualmente e no por brinda mucho informacion riba e status di e proyectonan aki y con grandi e risiconan ta.
“Unabes cu mi caba di haya tur e informacion mi lo bay parlamento cu ne. Pasobra bo ta papiando di dos proyecto akinan cu ta costa riba 400 miyon florin di pueblo di Aruba,” e minister a bisa. E mandatario ta bisa cu e no ta bay permiti pa pasa cu ne locual a pasa cu hospital cu cierto momento el a costa un overall di casi 80 miyon florin.
Asuntonan cu no ta regla ainda
E mandatario ta bisa cu tin un cantidad di asuntonan pa locual ta Watty Vos Boulevard cu no ta regla ainda, cu no ta cla ainda y por tin consecuencia pisa pa pais Aruba. “Mi ta haya hopi irresponsabel locual a tuma luga. Pero mi kier warda un rato pa mi haya tur e informacion na un forma corecto y responsabel pa trece esakinan na parlamento, conseho di minister y despues prensa cu comunidad di Aruba.”
E mandatario a sigui splica cu tin hopi problema den Watty Vos Boulevard anto e discusion di awa ta uno cu tur hende ta na altura di dje awo. Pero e problemanan ta hopi mas grandi ainda segun e mandatario. “Mi no ta bay bisa cu e ta un mal proyecto, pero mi no ta kere cu e tabata un proyecto cu tabata tin prioridad na momentonan aki. Mi ta kere el a wordo haci hopi pura y hopi lihe. Tin un dicho cu ta bisa cu sopi pura ta sali salo, y mi tin miedo cu esaki ta bira un sopi sala”, e mandatario a expresa. E mandatario kier colecta tur e echonan prome pa no bay specula of mustra cu ta purba pinta un proyecto malo, pa asina brinda mas informacion riba e status y desaroyo di e proyectonan aki den e dianan nos dilanti.
‘Corupcion di siglo’
Aña pasa Bon Dia a publica un articulo cu a toca e tema di e proyectonan aki y con segun e tempo ey parlamentario y awor minister Dangui Oduber (MEP) a trece dilanti cu e proyectonan aki lo por ta e corupcion di siglo na Aruba. Oduber a splica cu na juli 2015 e bid pa e proyecto di Green Corridor a wordo gana pa compania Colombiano Odinsa y esun di Watty Vos Boulevard pa e compania Portugues Mota Engil. ”Supuestamente Green Corridor ta importante pa e portofolio di Odinsa y asina mes nan ta bende e proyecto aki”, Oduber ta bisa. Esaki referiendo na un publicacion di Carlos Zubieta, arkitecto pa e proyecto di Green Corridor kende e tempo ey a bisa cu e compania Odinsa ta comprometi cu e futuro di nos isla, algo cu awor ta aparenta di ta diferente. Sr. Dangui Oduber (MEP) a sigui splica e tempo ey cu e compania Odinsa lo a bende of traspasa e proyecto di Green Corridor pa Mota Engil. E compania Mota Engil lo a bende na januari 2017 ambos dicho proyectonan cu e compania multi nacional Infrared Infrastructure na un balor di 400 miyon florin, cual segun Dangui Oduber ta e balor real di e proyectonan aki.
“Dicon e compania Infrared cu awor ta esun responsabel pa e ehecucion di Green Corridor y Watty Vos Boulevard no a bid desde principio?” Dangui Oduber a cuestiona riba su cuenta di Facebook. E compania Infrared Infrastructure ta un compania cu ta inverti y maneha proyectonan di infrastructura globalmente y si nan ta cumprando un of mas proyecto na balor di 400 miyon florin, ta paso cu tin ganashi aden. Niun compania global lo inverti den algo cu no tin ganashi. Si locual minister Dangui Oduber ta bisa ta berdad, esaki nifica cu tin un diferencia di casi 300 miyon florin cu a wordo gana clean riba custia di pueblo. Bon Dia Aruba a sigui conduci un investigacion riba e asunto aki mirando cu di berdad tabata tin cosnan cu no tin logica aden. Nos lo keda pendiente tambe pa e informacion cu minister Otmar Oduber lo tin di presenta pronto riba e asuntonan aki.
