Desde aña 2001, Fundacion Ban Uni Man pa Cria nos Muchanan ta percura pa muchanan di poco recurso por haya algo di come tur mainta tempran na scol mes.
E ultimo aña e cantidad di mucha a subi demasiado, ya cu tur aña e cantidad di mucha cu mester di e tipo di ayudo aki a crece. Nan tabata gastando 25 mil florin pa luna. Na 2014 nan a percura pa 794 mucha, pero aña pasa nan reserva a baha hopi cu nan a haya nan mes forsa di pidi tur scol pa baha e cantidad di muchanan. Pues di casi 800, nan a baha te bou di 600 mucha. Kiermen 200 mucha mester wordo saca di e proyecto aki.
Necesidad
Sr. John Fun, kende a inicia Fundacion Ban Uni Man pa Cria nos Muchanan na Aruba a laga un reflexion: “Tin biaha e hendenan ta puntra mi: Kico a pasa cu e 200 mucha ey. Ami no kier ni pensa riba dje. Pasobra tin un necesidad na Aruba …”. Te hasta tin biaha e mes ta puntra kico e muchanan ta haci durante e vakantie, ya cu e fundacion ta asisti e muchanan durante scol so, pero durante vakantie –segun sr. Fun- bo ta puntra bo mes kico e muchanan aki ta come…
Actualmente e cifra di muchanan cu e Fundacion Ban Uni Man pa Cria nos Muchanan ta dunando asistencia ta 572. Pero nan tin un intencion fuerte pa subi e cantidad aki atrobe. P’esey durante e presentacion di nan relato financiero anual, sr. Fun a indica cu nan intencion no solamente tabata di mustra tur hende y patrocinadonan mas grandi, kico nan ta haci cu e placa, pero tambe pa e comunidad bira consciente di e necesidad cu tin den comunidad. Nan kier haya mas hende pa sponsor e muchanan y sigui alimenta nan. E ta spera cu e refineria lo por habri atrobe ,ya cu Aruba Way Fundation tabata un sostenedo grandi e proyecto aki. Segun sr. Fun esaki ta un deseo no solamente pa nan fundacion pero pa tur hende di Aruba.
Estadistica
Encuanto cual ta nan target group, sr. Fun ta haya cu ta dificil pa defini nan, pero nan ta ripara cu hopi biaha ta trata di e mesun historia di muchanan cu ta bin di un famia cu tin un mayor so.
El a trece algun estadistica pa cada un di esunnan presente lo por a bin cu nan propio conclusion. Na 2010, nos forsa laboral tabata consisti di 46 mil hende di locual 10 mil tabata ganando salario minimo. Otro dato interesante tin di haber cu tabatin 1.440 hende muhe divorcia cu yiu; y tabatin 6.860 hende muhe no casa cu yiu. Sr. Fun a bin cu e datonan aki pasobra hopi biaha nan ta tende cu e muchanan cu e fundacion ta asisti cu cos di come y bebe ta bin di e tipo di famia aki di un mayor so, ya sea e tata of mama di e mucha.
Otro estadistica cu a wordo saca na 2012 ta mustra cu un famia consistente di un mayor y un yiu mester di 2.500 pa luna pa nan por sobrevivi. Y si nos ta ripara cu tin hopi hende cu ta gana salario minimo nos por imagina cu nan ta bibando riba e rand di pobresa “Tin hopi pobresa na Aruba cu nos no ta wak”, sr. Fun a declara.
Existencia
Fundacion Ban Uni Man pa Cria nos Muchanan tin 14 aña di existencia cu e bunita proyecto di percura cu e muchanan den necesidad lo por cuminsa su dia di scol, sin stoma bashi. E trahadonan Social di scol ta screen e muchanan pa ricibi e ayudo aki, nan sa cual ta e muchanan cu por y esun cu no por, segun sr. Fun.
E scol mes ta esun cu ta scoge e muchanan, mientras cu e fundacion menciona -danki na e donacion di nan sponsornan- ta percura pa e muchanan aki por haya un sandwich y cos di bebe como desayuno.
E feedback cu nan ta haya fei di scol ta cu no ta asina cu nan ta tenta e muchanan, ya cu e muchanan cu ta ricibi e ayudo aki ta wordo haci di un forma discreto pa no expone nan. Tur aña na cuminsamento di aña escolar e fundacion ta manda un fax pa tur scol pa inscribi y actualisa e cantidad di mucha, ya sea cu nan ta hisa of baha esey.
