Efectividad vacuna (1).jpg

E descubrimento di diferente vacuna a yuda pa preveni malesanan cu a cobra hopi bida durante historia di humanidad.

Sinembargo a pesar di su efectividad, awendia un ola di controversia y te hasta di rechaso a wordo lanta rond di uzo di e vacunanan. E controversia aki tin di haber cu aspecto religioso, cultural, etc.. acerca efecto, siguridad di e vacunacion. Te hasta ta wordo bisa cu vacunacion obligatorio ta un violacion contra derechonan individual.

E rechaso di cierto sector contra e vacunanan no ta data for di awor. For di cu e vacunacion a cuminsa na final di siglo 18, nan tin oponentenan cu a yega di sostene cu e vacunanan no ta funciona y cu nan por bira peligroso. Te hasta esunnan cu ta comparti e tendencia aki ta haci enfasis cu higiena personal ta suficiente pa preveni cualkier malesa.

Vacuna

Dr. Wilmer Salazar kende a yega di traha den compania di fabricacion di vacuna a papia cu rond di e vacuna tin hopi mito, leyenda, berdad y mentira… Teniendo na cuenta cu pa ehempel e cepanan di e virus cu ta causa e malesa pa influenza cu ta cambia cada aña,  ta wordo recomenda pa aplica e vacuna contra influenza cada aña. Actualmente Departamento di Salubridad Publico (DESPA) a bin cu un campaña masivo di vacunacion contra influenza cu ya a yega di cobra bida di hende riba nos isla.

Segun Dr. Salazar, Organisacion Mundial di Salud (OMS) ta bisa “bon cla y raspa” pa nos por evita e tipo di malesa manera griep,  influenza, flue, causa pa e mesun virus di influenza tipo Ay B nos mester ta proteha contra dje. “Y un forma efectivo di proteccion ta e vacuna”.

P’esey cada aña DESPA ta informa nos comunidad pa asina e  hendenan cu tin factornan di risico di haya e virus di influenza ta alerta.

Contra vacuna

Sinembargo e ta lamenta cu social media y demas medionan masivo di informacion  ta wordo scucha comentarionan manera cu e vacuna ta causa sindroma di Guillain Barré, te hasta incluso Autismo. 

Dr. Salazar a reacciona riba e tipo di pensamento aki bisando cu e por pone su man na candela hunto cu organisacion internacional di salud cu ta nenga cu vacuna di influenza tin relacion cu Autismo.  E ta bisa cu cualkier persona cu ta hayando remedi, of e persona ta haya un infeccion pa bacteria, te hasta factor genetico ta hunga un rol pa loke ta trata trastorno neurologico.

Dr. Salazar a trece un comparacion pa kibra cualkier mito of posicion contra vacunacion. E ta bisa cu normalmente den un comunidad ta wordo presenta anualmente un of dos caso di Guillain Barré den un poblacion di 100 mil pa 200 mil habitante. 

Kiermen cu si Aruba tin un poblacion di 100 mil habitante normalmente nos por haya un of dos caso di e trastorno neurologico aki. Mientras cu di otro banda di un (1) miyon di hende cu a haya vacuna lo por tin e posibilidad cu un persona lo por haya un sindrome neurologico.

Esaki kiermen cu den e caso di Aruba di algo mas cu 100 mil habitante e posibilidad ta hopi minimo pa haya un sindrome asina pa causa di vacunacion. “Esaki kiermen cu si mi ta hunga 10 mil biaha un lotto grandi manera esun di Merca, cu ta mas grandi y cu mas number cu esun di nos, e posibilidad pa mi gan’e ta mas grandi compara cu si mi lo por haya un complicacion pa causa di e vacuna aki”, el a bisa.

Poblacion di risico

Segun Dr. Salazar nos tin un poblacion di risico hopi halto, nan ta alrededor di 30 mil hende, entre nan hendenan diabetico, hendenan cu ta sufri di malesa di pulmon cronico, hendenan mayor cu 65 aña y hendenan na cualkier edad cu nan sistema inmunologico ta hopi abou.

Tambe muchanan menor cu 2 aña di edad cu ainda no tin proteccion of nan no a desaroya nan sistema inmunologico. Incluso hendenan cu HIV positivo cu ta bou tratamento of cu ainda no a desaroya e virus, por haci uzo di e tipo di vacuna aki pa protege su mes.

Tambe hendenan obeso por haci uzo di e tipo di vacuna aki, ya cu e obesidad ta un factor di hopi risico. Hendenan muhe na estado por haci uzo di e vacunanan  pasobra e ta protege su mes y e criatura. “E baby despues cu ta nace tin un garantia di dos of cuater luna cu nan ta haya proteccion”.

P’esey e ta haci un yamado na henter comunidad pa probecha e campaña di vacunacion contra Influenza cu ta andando aworaki. E vacuna ta gratis pa e hendenan di e grupo di riesgo cu nos a menciona ariba. E persona por acudi ya sea cerca su Dokter di Cas, WGK, Dep. di Malesa Contagioso (Despa).