Despues di a firma e acta di formacion di Renobacion Aruba N.V., president interino sr. SergeMansur a duna di conoce cu e ta cla y entusiasma pa cuminsa traha. E empresario local a tuma e responsabilidad basa riba su conviccion den e vision di renobacion y e experiencia cu ya caba e tin den e area aki. Mansur a afirma cu e iniciativa di Gobierno pa uni forsa cu sector priva tin un potencial hopi grandi mirando e solidez di instancianan financiero local cu a dicidi pa participa.
Dialuna tabata e prome dia di trabou di Mansur como president di Renobacion Aruba N.V. Fuera di atende cu algun otro formalidad di e formacion, el a duna di conoce cu su tarea ta cuminsa cu inspeccion di e condicion di e edificio cu Gobierno di Aruba a pone como capital. Ta trata di ex-sede di Voogdijraad den Emanstraat. Mester haci un evaluacion completo di paden y pafo y traha un plan structural pa su reparacion y restauracion. Un bes cla, e edificio ta wordo pone riba mercado na huur.
“Un bes cu completa esey, ta wak mas edificio y proyecto pa continua cumpli cu nos mision,” Mansur, kende a admiti cu di manera informal, comisario y accionistanan a cuminsa papia ya caba di otro edificionan cu tambe lo bay cumpra pa drecha y asina poco poco mehora e aspecto den centro di Oranjestad y San Nicolas, pero tambe rond di Aruba.
“E ta un causa cu mi ta kere hopi aden,” Mansur a afirma. Recientemente e empresario a renoba un cas antiguo dilanti di Fort Zoutman y tambe ta den proceso pa renoba un edificio antiguo di dos piso na Oranjestraat patras di Caya Grandi. “Mi ta haya cu Playa ta hopi bunita y merece atencion di nos tur pa restaura loke nos mester restaura.”
Ta comenta acerca cu tin hopi edificio bunita cu ta den mal estado y e ta kere cu Renobacion Aruba N.V. ta e iniciativa ideal pa atende cu esey. Ningun compania, ni instancia por haci’e su so; pesey ta importante pa tur hende cu tin edificio, contribui na esaki.
“E tabata un proceso hopi largo pa yega na esaki, pero nos a yega y awo nos tin cu bay traha.” Mansur a bisa. Entre e accionistanan cu ta forma parti di Renobacion Aruba N.V. tin Caribbean Mercantile Bank N.V., Aruba Bank N.V., Ennia Caribe (Leven) Aruba N.V., Fatum Life N.V., Romar Entreprises N.V. y Banco di Caribe Aruba N.V.
