Sr. Diego de Cuba kende ta presidi STA a declara na Bon Dia Aruba cu cada biaha ta bira mas dificil pa e trahadonan en general lo por busca nan derecho pa nan wordo representa sindicalmente, ya cu tin biaha nan ta bira victima di intimidacion. E ta splica cu un CAO ta trece un cambio hopi grandi, ya cu hopi gerencia ta mira sindicato como un “enemigo mortal”. Sr. de Cuba ta haya cu e percepcion aki contra sindicato mester cambia ya cu un doño di empresa mester wak sindicato miho como un organisacion cu lo por yuda nan.
“Kere mi, mayoria di e companianan cu nos ta representa, mi no sa si ta un milager e ta, pero milagrosamente casi tur a progresa”, el a bisa.
Actualmente STA representando e trahadonan di mas cu 37 compania. Sr. de Cuba ta reconoce cu e responsabilidad sindical aki ta trece cun’e un enorme cantidad di trabou pa nan. Ademas mirando e dificil cu e situacion ta, e ta pone tambe e sindicato den un situacion dificil na momento di negosha.
“E ta pone e sindicato den un situacion dificil na ora di negosha tambe pa bo por logra lo maximo pa e trahadonan”, el a declara na e matutino aki.
Como lider sindical e ta sinti su mes satisfecho cu “danki na Dios”, cu nan lo por logra adelanto pa empleadonan di e companianan cu nan ta representa.
E ta señala cu hopi biaha nan ta pidi e trahadonan “pa carga pasenshi”, pasobra negosha un contacto colectivo (CAO) no ta un trayecto facil.
E ta kere cu un representacion sindical ta na su luga, specialmente ora cu ta trata di trahadonan di hotel cu no tin niun defensa. Ademas e gastonan huridico awendia ta caro, simplemente un consulta of un carta cerca un abogado ta alrededor di 350 pa 500 florin.
P’esey ora cu e trahadonan ta unifica su mes pa medio di un sindicato, e organisacion aki ta percura pa tur defensa di su miembronan. “E ora ey bo no ta bay sinti esey duro den bo cartera tampoco”.
