Den un encuentro cu SPA, SADA y FTA minister di Husticia Arthur Dowers ta bisa cu tin hopi boto chikito y yate priva transportando pasahero cu ta keda ilegal na Aruba.
E informacion aki ta for di un relato di e Ministero di Husticia:
E mandatario ta bisa cu a papia cu Departamento Maritimo tambe pa amplia e cooperacion existente, cerando e frontera mas ainda pa yegada di botonan.
“Tin hopi boto chikito of yatenan cu ta haci hopi cos ilegal, corupcion di funcionarionan na Venezuela. Autoridadnan tin of ta compilando informacion riba e navenan aki, ta facilita salida di ciudadanonan for di Venezuela y nan entrada ilegal na Aruba. A constata cu e navenan ta biaha hopi facil entre Aruba y Venezuela y tin informacion cu ta importa hopi cos ilicito. Pero tambe ta haci transporte ilegal di pasaheronan cu supuestamente tin ticket pa biaha bek cu avion. Pero unabes cu nan yega tera, no ta bolbe nan pais. Esaki ta un di e puntonan cu ta bay traha riba dje pa evita ilegalidad, e ta bisa.”
“Siman pasa ainda Inmigracion a debolbe 5 nave cu tur su pasaheronan y mercancia abordo, cu a bin for di Colombia, pasobra nan no tabata cumpli cu e rekisitonan di ley. Pero lo mester keda vigilante pasobra criminalnan lo busca un otro forma. E salario di un aña nan ta saca den un dia y nos ta bay sigui uza tur e medionan cu nos tin pa protege nos comunidad.”
