Diadomingo ultimo Stichting Parkietenbos Aruba a tuma e prome stap den nan plan di varios fase pa asina stop e contaminacion tumando luga actualmente den e bario di Parkietenbos. E coleccion di firma lo sigui tambe online, pa asina mustra gobierno cu mester bin cu un solucion rapido pa e bario cu ta sufri di problemanan di salud cu tin nan raiz den e maneho di desperdicio.
Relacionista publico di e fundacion, Aldrich Kelly, a conta Bon Dia cu nan kier pone un stop na e dos fuentenan ‘principal’ di contaminacion den e area, esta Ser’i Teishi y dump na Parkietenbos. Durante e accion, Kelly a duna un calculacion aproxima di 600 pa 800 firma cu e fundacion a colecciona den e tempo cu nan tabata presente na compleho deportivo na Simeon Antonio, di 9 or di mainta pa 2 or di atardi.
Firmanan lo bay parlamento y gobierno exigiendo solucion ‘rapido.’
E meta di e accion aki, cu lo sigui, mirando cu ta e prome di varios, ta pa hiba e firmanan parlamento y tambe gobierno, pa asina gobernantenan tuma e decision di stop e polucion tumando luga den e area. E prome aspecto di e problema cronico di polucion den e area aki, ta cuminsa cu e practica di dera envirobales den Ser’i Teishi, pero e fundacion lo ataca conhuntamente esaki y e dump.
“Den e bario tin hopi hende malo, y nos no a haya atencion pa e hendenan malo”, Kelly a vocifera. “Muchanan ta pidiendo pa sali di e bario, hende grandi tambe ta den problema, pues pa esaki gobierno tin cu acepta su responsabilidad cu un mal maneho di medio ambiente a causa contaminacion pa e area y nan tin e responsabilidad pa corigi’e y drech’e mas rapido posibel’.
‘Tin hende cu ta malo caba cu pa via di e gas emiti pa Ser’i Teishi ta bira mas malo.’
Kelly ta splica riba e fenomeno di envirobales, cu e deramento di e sushi procesa aki ta emiti un gas cu ta sali di e suelo, cual eventualmente pa via di biento ta penetra e bario. “Bo tin un par di cos robes. E luga no ta adecua, y e bales of e contenido no ta adecuado pa dera y tap’e pasobra toch e ta pasa door di e santo bin ariba. Esey kiermen cu nan tin cu inspecciona y investiga e bales pa determina si e sushi ta fermenta y forma metaan manera ta mustra”.
E relacionista publico a splica cu el a weita cu hasta mata mes ta bira geel ora ta bin den contacto cu e gas aki, ‘y despues bo ta haya hende cu ta haya esaki den nan pulmon, cu eventualmente ta perde sinti di hole, ta bira malo, haya alergia’ y otro efectonan negativo. “Tin hende cu ta malo caba, cu pa via di e situacion unda cu Ser’i Teishi ta emiti e gasnan aki, ta bira mas malo ainda.”
