Tin futuro pa refineria di exportacion den Caribe?

Pa hopi aña a opera den Caribe, riba e islanan, un cantidad limita di refineria cu ta orienta riba produccion pa exportacion: Curaçao, Aruba, Trinidad & Tobago y St Croix. Mayoria di nan, cu excepcion di St Croix, tin un historia di alrededor di un siglo.

E prome escogencia tabata basa entre otro riba stabilidad politico, siendo tur cuatro estableci den teritorio (ex-) Britanico, Hulandes y Mericano. E otro refinerianan riba un isla (Cuba, Republica Dominicana, Jamaica, p.e.) ta refineria chikito pa abastece mercado local.

Loke tur cuatro ta comparti actualmente ta nan status di inoperativo, cu esun di Aruba y St Croix cu e record mas grave, ambos cera desde 2012. E casonan mas reciente di ciere ta Curaçao y Trinidad & Tobago, cu tin ambos menos di 2 aña sin opera. Na tur cuatro pais tin cierto interes publico pa logra re-apertura, cu intento intensivo di buskeda di posible partner cu por carga e peso di inversion grandi cu un eventual re-apertura ta rekeri.

Den e siguiente analisis nos lo trata cada caso segun nan propio situacion, cu ta mustra caracteristica comun pero tambe diferencia clave. Na final nos ta desea di yega na un evaluacion con grandi e probabilidad ta cu e refinerianan aki lo bolbe den operacion atrobe, cu un perspectiva mas a largo plazo di sobrevivi den e actual mercado internacional di petroleo. Prome cu esey, algun informacion basico tocante e desaroyonan mundial den sector di petroleo cu lo tin influencia riba cada un di e refinerianan aki.

Tendencianan global.
En general petroleo ta ainda e producto cu ta domina produccion di energia, como tambe gran parti di transporte, y ademas tin un contribucion grandi den industria petroquimico, entre otro den produccion di diferente tipo di plastic, un producto indispensable den e mundo moderno aki. Aunke cu e situacion aki ta bay keda asina ainda pa varios decada, ta remarcable e interes y inversion cu e companianan grandi di e sector aki ta haci den energia renovable, por ehemplo den energia solar y di biento. Tumando como punto di salida cu na cierto momento produccion di petroleo lo no ta creciendo mas, por observa un tendencia di cautela grandi den renobacion y/o eventual construccion di refineria nobo. Na Merca por ehemplo e ultimo refineria completo a ser construi na 1977, aunke tabatin aumento di capacidad y renobacion den varios di e 135 refinerianan cu ta operando ainda na inicio di 2019.

E hecho cu e 4 refinerianan menciona ta produci pa exportacion, como mercado interno tur cuatro ta insignificante, ta haci cu nan mester busca nan caminda den un mercado cu pa varios decada caba conoce un produccion mas cu suficiente di producto manera gasolin y diesel, tambe den nos region. Esaki no ta cambiando y ta crea un panorama dificil pa nan tur cuatro.

Otro factor importante ta e criterionan di calidad cu a impone globalmente riba productonan petrolero pa loke ta cantidad di azufre cu nan por contene, manera den diesel y heavy fuel oil. Tambe tin restriccion riba emision di aire contamina, cu no lo bira mas flexible tampoco y ta rekeri inversion extra pa cumpli cu e normanan aki. Esaki no ta tur aspecto pa tene na cuenta, pero en todo caso ta indica caba cu re-apertura di un refineria ta asunto di inversion grandi, cu ta tarda decadas pa recupera. E perspectiva a largo plazo ta bira anto sumamente importante.

Caso Trinidad & Tobago.
Trinidad & Tobago ta un caso excepcional como cu e pais pa varios decada tabatin su propio petroleo. E produccion ey a mengua gradualmente y actualmente e pais ta produci alrededor di 50.000 bari pa dia (bpd), loke no ta suficiente pa suministra crudo na nan propio refineria, cu ta fuera di operacion desde december 2018 y tin un capacidad di 190.000 bpd, cu consecuencia cu na final e refineria tabata opera cu practicamente 100.000 bpd di crudo importa. Como cu e refineria tin apenas un aña cera, e tin bon perspectiva den sentido tecnico pa cuminsa opera atrobe. Sin embargo, hasta den e caso aki ta anticipa cu ta necesario alrededor di US$ 1,4 biyon pa renobacion. Esaki ta haci e re-apertura leu di ta un hecho cumpli. Gobierno di Trinidad & Tobago a sinta cu diferente candidato pa tuma e refineria, entre otro un consorcio lanta pa e sindicato di trahador di petroleo ( OWTU) cu yama Patriotic Energies and Technologies Company Ltd (PETCL). Otro interesado tabata Klesch Group cu simultaneamente tabata bid riba refineria di Curaçao. Finalmente a scoge recientemente pa Patriotic, cu a ofrece di pone di antemano US$ 700 miyon riba mesa, plus 200 miyon mas na caminda. No ta conoci di unda un sindicato ta saca placa, pero nan relacion cu un compania di Surinam, Sunstone Equities, ta percura por lo pronto pa mas pregunta y duda ainda. Gobierno no kier a considera Klesch pasobra nan a declara di no tin placa pa duna y a ofrece paga gobierno, cu tempo, a traves di impuesto.

Otro factor relativo di bentaha di Trinidad & Tobago ta cu e pais tin tambe produccion di gas natural y tin un di e instalacionnan mas grandi di LNG riba continente Mericano. Den caso di converti pa gas natural envez di kima fuel oil den proceso di refinacion e pais por haci esaki cu hopi menos costo, pero no tin informacion di esaki ainda.

Caso St Croix (Hovensa refinery).
E refineria di St Croix, Hovensa (1966), tabata un joint venture entre Hess Oil (USA) y Pdvsa. E ta e refineria mas grandi riba un isla di Caribe, cu capacidad di mas di 500.000 bpd y tabata aparece riba lista di e 10 refinerianan mas grandi di mundo. Hess y Pdvsa a dicidi di para operacion na 2012 despues di varios aña di perdida grandi. Problema grandi pa Hovensa tabata nan mercado riba costa oriental di Merca, cu competencia grandi di e refinerianan riba costa firme cu tabatin acceso na gas natural pa kima den proceso di refinacion. Den ultimo añanan a usa solamente e facilidadnan di almacenahe di crudo y producto petrolero, cu un capacidad di 34 miyon bari, pero e aña aki a logra cera un acuerdo cu Limetree Bay Refining, cu ta bay usa e instalacionnan pa produci producto cu contenido abao di azufre pa cumpli cu e ultimo standardnan internacional di transporte maritimo. E planta lo ta operacional parcialmente, procesando alrededor di 210.000 bpd. E compania BP Plc lo provee crudo y ta encarga tambe cu mercadeo di e productonan. Segun Argus Media e mercado principal ta atrobe costa oriental di Merca, unda a cera varios refineria, pero Argus ta duda si e oportunidad lo existi pa hopi tempo, mirando e competencia riba un mercado mundial cu produccion excesivo. Lo inverti inicialmente US$ 1,4 biyon pa rehabilita e planta.

Curaçao.
Refineria Isla ta terminando den e dianan aki su contrato di lease di varios decada cu Pdvsa, y tin un convenio provisional cu e grupo internacional Klesch Group, cu tin un refineria di 90.000 bpd na Alemania (ex-Shell), pero ta mas den negoshi di producto petrolero. Segun e noticianan al caso, Klesch lo bira propietario di e refineria, pero no di e facilidadnan di almacenahe na Bullenbaai. Esaki ta mustra un cambio drastico di e maneho di varios decada unda tabata lease e propiedad cu Pdvsa. No a scucha ainda un motivacion di banda di gobierno di Curaçao pa e cambio di rumbo aki.

Klesch lo ta bay usa como 200.000 bpd di e capacidad total di 335.000 bpd di e refineria, cu tin capacidad di produci gasolin y diesel, banda di otro producto. No ta conoci ainda di unda lo bay trece crudo, ya cu Venezuela, sigur despues di terminacion di e contrato di lease y pa motibo di e actual escasez di crudo Venezolano, no ta parce un opcion pa basta tempo. No ta conoci tampoco si tin plan pa recuri na uso di gas natural pa por produci na un nivel di costo mas abao.

Klesch Group tabata den e contienda pa haya e refineria na Trinidad & Tobago tambe. Aki nan a keda na di tres lugar, primordialmente pasobra Klesch a declara di no por paga nada adelanta y a ofrece pa paga a traves di impuesto.

Aruba.
Aruba ta parce di ta e caso mas problematico di e cuatro refinerianan. Cera na 2012, tabatin un deterioro hopi grandi di e instalacionnan, cu ta rekeri un capital considerable pa rehabilita e planta. Pa e rehabilitacion parcial pa e planta por funciona como un’upgrader’ e actual supuesto operador Citgo lo a inverti sumanan cu tabata varia entre US$ 650 miyon y US$ 1.000 miyon pa rehabilita e refineria di 235.000 bpd pa por procesa alrededor di 120.000 bpd, pa duna como 90.000 bpd di crudo mehora. Sin embargo, solamente un fraccion di esey a keda inverti y e planta nunca a surpasa e fase di inspeccion y inventarisacion. Partinan operacional ta e terminal di almacenahe di crudo y e facilidadnan di importacion di diferente tipo di combustible cu Aruba mester.

Banda di e rehabilitacion costoso, ta keda interogante pa loke ta suministro di crudo. Venezuela pa varios aña lo no ta un opcion, mirando e actual produccion cu a cay te alrededor di 750.000 bpd, di mas di 2 miyon bpd na 2017. Un futuro como upgrader tambe ta mustra scur, pasobra e unico crudo cu mester e proceso aki ta e crudo di Faha di Orinoco. Na e momento aki e upgradernan Venezolano mes ta paralisa y ta usando e instalacionnan pa mezcla crudo.

Mientras tanto tin un acuerdo entre gobierno di Aruba y Citgo (PDV Holding) pa suspende e contrato, dunando Aruba e oportunidad di busca un otro candidato pa opera e planta. Gobierno den su declaracionnan a laga sa di tin un lista di 25 compania interesa, y cu tambe lo bay tene un ‘roadshow’ na Houston, unda tin hopi compania petrolero, y di servicio petrolero, estableci. Tambe a menciona e posibilidad di considera un renobacion completo di e instalacionnan, sin cu a papia di posible costo. Algun aña atras e experto di petroleo Nelson English a tene algun presentacion na Aruba, unda el a calcula e costo di rehabilitacion pa solamente por produci e mesun producto intermedio cu e refineria tabata produci desde 1991, na US$ 2,1 biyon. Pa un renobacion completo, incluyendo e capacidad pa produci producto final manera gasolin y diesel cu contenido abao di azufre, el a calcula un costo di por lo menos US$ 3,1 biyon.

Conclusion.
Poniendo hunto e trayecto di ‘calvario’ di e refinerianan di exportacion den nos region, ta mustra cu nan tin hopi en comun. Por ehemplo e hecho cu mundialmente tin un exceso di capacidad di refinacion. Den mayoria di caso di refineria nobo construi, ta trata di facilidad cerca di e fuente – manera e tendencianan na e.o. Iraq, Saudi Arabia, Venezuela – o cerca di e mercadonan principal. Riba un isla cu no tin mercado propio di algun tamaño, y cu extra complicacion logistico, y ademas sin acceso na gas natural, cu excepcion di Trinidad & Tobago, cu tin gas natural pero te awor no ta usa esaki den su refineria, ta parce logico cu no tin necesidad mas pa como 1,2 miyon bpd di capacidad riba e islanan. Si acaso tin un mercado parcial pa e refinerianan aki, anto ta bira un cuestion di cual ta ofrece e oportunidad di mayor rentabilidad, tumando na cuenta tambe loke e instalacionnan ta produci.

Aki ta parce cu St Croix tin un bentaha, den e sentido cu e isla ta teritorio Mericano, loke ta haci exportacion pa otro teritorio Mericano mas factible. Sin embargo, e falta di gas natural pa usa den su proceso, ta keda un punto debil, comparti cu e otronan. Refineria di Trinidad & Tobago segun informacion di e compania operador nobo, ta planea pa habri den di tres trimester di aña 2020, mientras cu Curaçao tambe ta trata di logra esey pa 2020.

Aruba facilmente entre e competidornan den region ta sali como esun cu menos perspectiva. Tur e tres otronan ta refineria completo, razonablemente manteni y cu producto final. Aruba, cu prome cu ciere den añanan 80 di siglo pasa no tabata produci producto final mas, y manera ilustra anteriormente, e opcion ey ta uno cu un ‘price tag’ di sigur un biyon dollar extra, ta parce e ultimo den e ‘stoelendans’ aki. No ta pornada cu gobierno anterior a opta pa un upgrader, loke finalmente tambe a resulta un soño, o pesadiya, pa e problemanan grandi den e consorcio di Pdvsa y companianan liga. Cu tur tres competidor di Aruba den nos region operando atrobe den curso di 2020, cu nan propio duda y incertidumbre si, e perspectivanan lo ta menos faborable ainda.