Algun dia atras minister di Transport, Integridad, Naturalesa y Asunto di Adulto Mayor, Ursell Arends, a anuncia cu director di Arubus, Sr. Edwin Mohamed, a tuma su retiro inmediato. Esaki a trece speculacion tocante ken lo bira su reemplaso y e nomber di e ex presidente di ARA, Sr. Frederick Nuboer, a ser menciona.
Na momento cu e noticia a bira conoci cu gobierno a alivia Sr. Mohamed di su cargo di forma inmediato, reportera di Bon Dia Aruba a tuma contacto cu minister Arends pa puntra si en berdad tabatin otro persona caba cu lo asumi e cargo aki of si tin un candidato, kico ta e proceso pa apunta un director nobo y kico ta e motibo cu a dicidi pa libera Sr. Mohamed di su cargo.
Minister Arends a splica den su contesta cu e situacion financiero di Arubus ta critico cual a
ser confirma pa varios instancia profesional y imparcial. El a indica cu tin un diferencia di opinion y un diferencia fundamental di vision entre e accionista y hunta di directiva, compara cu e director saliente.
El a señala cu e punto di salida di Gobierno ta cu Arubus no por sigui depende solamente riba fondonan publico y cu e instancia mester expande su servicionan comercial tambe, na mes manera cu tur otro N.V.
Tocante nombramento di un director nobo, el a splica cu na prome instante lo apunta un gerente temporario, mientras cu e hunta di comisario independiente di gobierno ta traha riba seleccion di un gerente nobo na un forma transparente y conforme e reglanan di ‘Good Governance’.
Siguiente dia e noticiero local Noticia Cla a publica cu minister Arends a confirma cu Sr. Frederick Nuboer ta un candidato pa bira director interino di Arubus. E mesun portal a informa cu Sr. Nuboer mes tambe a confirma na e portal cu el a ser acerca pa e posicion di director interino.
Recientemente a sali na cla cu tabatin duda di Sr. Nuboer su integridad y su nombramento a causa controversia. Reportera di Bon Dia Aruba a contacta minister Arends pa confirma si e informacion aki ta corecto, pero te cu e ciere di e edicion aki no a ricibi contesta for di e minister.
Durante un conferencia di prensa dialuna mainta prome minister Evelyn Wever-Croes a ricibi pregunta for di miembro di prensa tocante e mesun topico y e mandatario a splica cu e nombramento di señor Nuboer en berdad a causa controversia.
El a sigui splica cu e situacion actual di Arubus ta delicado y mester un director cu tin un reputacion y integridad intachable pa lidera e compania, tanto internamente pa haya e respet
di e empleadonan y externamente unda tur stakeholder mester atende cu e compania pa
soluciona problemanan. Pa e motibonan ey Gobierno a pidi Arubus reconsidera e nombramento aki.
“No por ta asina cu nos Gobierno tin un maneho di integridad y un compania estatal ta haci lo contrario. Manera mi a menciona anteriormente, Gobierno no por tuma e decision of cambia e decision di Arubus pero si nos por pidi pa reconsidera e nombramento, y esey ta loke nos a haci,” prome minister a remarca.
