Den cuadro di refugiadonan di Venezuela

Den nos presupuesto di 2018 tin un suma reserva pa situacion di crisis cual ta 2 miyon florin. Esaki prome minister Evelyn Wever-Croes (MEP) a trece dilanti ayera durante rueda di prensa riba e crisis humanitario cu refugiadonan di Venezuela y efectonan pa Aruba.

Gobierno ta bisa cu e 2 miyon florin presupuesta aki ta un fondo solamente pa e prome auxilio. Awor cu peticion di Nacionnan Uni pa duna asistencia pa trato humano di Venezolanonan, incluyendo Aruba, tin calculacionnan andando. Segun gobierno, nan ta analisando pa wak kico e lo kiermen pa Aruba exactamente si nos mester bay duna e status di refugiado na tur persona cu ta sali di Venezuela, y con ta paga pa e gastonan aki of ken ta paga pe.

Desde siman pasa a bin un cambio den e postura di Hulanda, segun nos prome minister. Ya caba Hulanda tambe ta mirando cu ta algo cu nan mester por yuda, y minister di defensa, Ank Bijleveld a priminti cu logistica, traslado y transporte. “Pero tambe a traves di Hulanda nos ta purbando pa haya e asistencia financiero den cualkier cos cu nos tin cu haci”, segun minister Wever-Croes. E mandatario ta bisa cu e instancia cu a emiti e notificacion aki (UNHCR) tambe a ofrece pa cubri parti di e gastonan, cu nan condicionnan.

Momento pa ‘brainstorm’
Un di e preocupacionnan den comunidad ta si Aruba lo tin cu ‘cria’ e refugiadonan nos so, of lo bay busca un manera toch pa nan haya status legal den un forma pa nan por subi mercado tambe mientras cu nan ta aki. No solamente papiando pa esunnan cu ta akinan caba pero sigur tambe esunnan cu lo mester bin.

“E ta asina cu e peticion recien di Nacionnan Uni ta pa nos weita den ki manera nos por atende cu e hendenan cu ta akinan caba y no forsa nan pa nan bay bek nan luga.” Ainda gobierno ta na e mesun posicion; bo mester cumpli cu bo leynan, cumpli cu ley di estadia y permisonan. Ainda gobierno no ta den e fase pa duna e proteccion di refugiado na un persona cu ta ki nan ya caba ilegal. Na momentonan aki gobierno ta den deliberacion y ta djis ‘brainstorm’ cu otro riba con por cumpli cu Nacionnan Uni, segun e prome minister.

Rol di Reino
Nos a puntra prome minister cual lo ta e exigencia di Aruba pa locual ta e responsabilidad cu Hulanda mester carga pa e parti financiero. E ta bisa cu e notificacion recien di UNHCR ‘a cay nos bon.’ Pasobra prome cu esey, Hulanda tabata tin un actitud hopi mas di distancia pa e islanan y lag’e den nan man, segun e mandatario.

Reino awor ta bisa pues pa nos prepara y presenta nos plan anto mira kico tin mester pa cumpli cu esaki, segun e prome minister. “Mi no por bisa bo cuanto pasobra mi mes no sa cuanto total e ta of si por yega na bisa esey. Mi a weita plan di gobierno anterior cu a pensa nos ta bay acapara 500 persona. Pero ora number 501 yega landando, ki bo ta bis’e sigui landa? Bo no por.” E ta bisa cu nan ta haciendo palabracionnan pa limita e peso riba cada un isla anto reparti e riba mas.

Preparacionnan
E prome minister ta bisa cu e ta kere cu sigur e espacio traha pa e fondo di crisis aki no lo ta suficiente si mester pasa un crisis humanitario grandi na Venezuela. “Sinembargo, e preparacionnan si ta na caminda. Awor akinan nos ta sigui den e deliberacionnan, warda pa wak kico ta e costo total y presenta esaki na e instancianan aki cu a ofrece nan asistencia financiero y logistico den esaki.”

El a para keto un rato riba algo no directamente relaciona cu e tema aki, pero cu algo di haber cu esaki si: con nos como pais ta reacciona na cosnan asina? E ta un tema hopi delicado ora ta papia di hendenan cu aparentemente ta perdiendo nan bida pasobra no tin cuminda of remedi, prome minister Wever Croes ta bisa. “Nos cada un ta hende y no ta cos cu nos kier pa pasa cu otronan. Lo ultimo cu nos tin cu haci ta pa spin e cos aki den direccion pa gana un of otro punto politico.”