ORANJESTAD – Bon Dia Aruba den un reciente entrevista a puntra dentista Leonardo Maduro si ta haya cu tin dentistanan cu no tin permiso pa traha, pero ta scondi tratando cu pashent.
Maduro a bisa cu tin varios cu ta traha ilegal manera dentista na Aruba, e ta agrega cu locual ta mas tristo ta cu ‘nos mesun hende ta bay cerca nan pa nan busca ayudo den nan situacion dental’.
Sinembargo, e ta remarca cu cada hende tin e derecho di busca locual ta cumbini nan, aunke e ta agrega cu ‘logicamente, e no ta sigur’. Pa motibo cu si e ta ilegal, e dentista cu no tin permiso pa traha no tin su implementonan. No ta sigur si su cosnan ta bon sterilisa y ta safe pa por trata cu pashent.
Un ehempel cu Maduro a bisa ta si un dentista ta mishi cu sanger di pashent, y e aparatonan cu e ta uza no ta sterilisa, e por pega na e siguiente pashent cu un malesa manera HIV. E ta remarca cu traha cu hende su salud ta algo delicado.
Maduro a bisa cu scupi, sanger mester ta cauteloso, pa motibo cu tur esey ta contaminacion, anto ‘esey hende no ta realisa’. Segun Maduro, nan ta djis pensa pa spaar mas placa sin pensa.
Un tendencia cu Maduro tambe ta menciona, ta personanan cu ta bay afo pa haci beugels y despues nan ta bin bek Aruba. E ta splica cu e personanan aki ta kere e tratamento ta djis pone beugels y ta cla. “E no ta asina, nan tin cu keda check cada luna. Cambia elastico. Keda haci chekeo, mester completa e proceso di hala e djente.”
Maduro ta splica cu pa e motibo aki, e tratamento di beugels ta dura di 2 pa 3 aña y no ta solamente pone beugels. E prijs ta halto pa 3 aña, pero ta e manera sigur di haci e proceso di beugels.
Den e casonan aki, Maduro ta bisa cu pashentnan ta haya nan mes den situacion cu no sa kico pa haci, paso nan no por keda biaha tur luna na e pais cu nan a bay pone beugels. Nan ta yega cerca un dentista local pa e beugels por wordo kita.
Sinembargo, Maduro ta bisa cu un trabou di beugels haci asina por tin efecto peligroso, anto por haci cu despues di tempo, e djentenan por bin afo, no tin control. “E por ta cu si a haci movemento, por ta algo chikito, pero si e movecion tabata algo lihe, e efecto por ta grave. E riesgo di perde djente ta hopi grandi.”
Segun Maduro a bisa cu tur dia ta haya casonan similar asina. E ta haya caso cu persona tambe ta haci implante di djente, anto nan ta bin bek, anto e djente ta cuminsa yanga, ya e momento no por a haci nada.
Locual Maduro ta purba haci ta un tratamento di nobo. “Aki e ta costoso ta berdad, pero e garantia ta pa bida henter. Tin hopi ta ofrece nan servicio pa drecha djente falso, y persona ta reacciona pa haci uzo di e servicio aki’. Nos mesun cultura di cos barata ta sali bo caro. E mentalidad tin cu cambia.
Maduro ta bisa cu un tratamento na Aruba pa pone beugels ta depende di e persona su situacion dental. E ta bisa cu tin ta sali Afl 6,000.- pa Alf 8,000.- pero tin cu ta sali hasta Afl 14,000.-, dependiendo e pashent. Den algun caso mester di specialista pa haci cirugia pa manda e kaak atras.
Pa motibo cu no tin kaak chirurg na Aruba, e pashentnan cu e problema di kaak tin cu bay te Corsou pa haci e cirugia. Aunke Maduro ta bisa cu tin otro tratamento avansa, cu awendia tin aparato pa evita e cirugia.
Maduro tin varios aña trahando como dentista. El a studia na Colombia pa motibo e tabata mas cerca di su famia y ta mas economico. Segun Maduro a bisa cu e ta bon decision pa studia eynan, y no tin nada di keha. Actualmente e ta trahando den consultorio Bella Bouche Dental Clinic hunto cu dentista Ana Maria Salazar.
