Tin cos cu ta bay bon y otro ta bay malo…

Mientras cu tin diferente evento planifica pa duna contenido na e promesa cu nos ta bayendo den bon direccion cu e maneho nobo basa riba integridad, ta sali na luz di dia un caso manera esun di ayera, unda a detene un persona pa malversacion y engaño na un escala considerable cu documento cu supuestamente ta representa un peticion berdadero di asilo politico.

Nos mester considera esaki un contradiccion grandi cu no ta cuadra? Of nos ta tuma esaki como un señal – positivo – cu tin accion tumando lugar pa para e tipo di practica aki? Probablemente e opinionnan ta sigui core via e lineanan di division politico, cu consecuencia cu un parti ta mir’e como señal cu husticia ta haci su trabao, mientras e otronan lo ta hari pasobra corupcion aparentemente no tabata monopolio di e partido den oposicion.

Nos ta kere cu ta di aprecia cu e situacion di refugiado no ta hayando solamente atencion na nivel di atende nan como refugiado, sino cu ta resulta awor cu ta actuando tambe contra esnan cu ta desea di probecha di e situacion pa gana algo extra. Den tur situacion nos lo mantene e tipo di abuso aki; importante ta kico ta haci contra esaki y con efectivo e accion contra e delincuentenan aki ta. Nos ta aplaudi anto cu bastante tempran den e proceso aki ya tin accion, esey ta duna confiansa den e autoridadnan hudicial cu a mustra di ta haci nan trabao.

Sin embargo, manera semper, esaki no por ta un confiansa ciego ni eterno, pero mester ta basa riba con e proceso aki ta sigui. Tambe a tuma e decision pa pone tramitacion di asilo den man di abogado. Esey no ta un garantia cu no tin corupcion, semper tin bufetenan cu ta mas cerca di un determinado gobierno cu por saca beneficio; nos a mira esaki den pasado tambe. Di otro banda, e proceso aki ta garantisa si cu tin un grupo limita di tramitador cu ademas por entrega documento redacta na un forma corecto. Al menos, esey ta loke nos ta spera.

Den nos edicion di awe por aprecia un copia di un peticion cu ta viola practicamente tur norma cu cual un tal documento mester cumpli, pa cuminsa cu un Hulandes desastroso cu ningun hende normal por comprende. Ta realmente un berguensa cu tin hende cu ta kere cu nan por cobra bon placa pa semehante desastre skirbi, cu ademas probablemente no a cana e caminda corecto tampoco. Ta bon pa pone un paro completo na e practicanan aki.

Pero tin mas aspecto di e problema di refugiado cu ta pidi nos atencion. Si en berdad nos ta hayando un fluho mas grandi di refugiado, lo mester bin medio financiero pa cubri e gastonan envolvi. Pa por atende esaki, nos a mira un delegacion parlamentario a bay Hulanda, y despues Bruselas, pa atende e asunto di refugiado cu ministerio di asunto exterior Hulandes, pa habri caminda pa bay papia cu representantenan di Comision Europeo. Despues di e reunion nos a haya di tende di e delegacion cu e bishita tabata exitoso, y cu a haya e compromiso di Comision Europeo cu lo tin 6 miyon euro disponible pa e aña aki y hasta 10 miyon euro pa otro aña. Sin embargo, ayera ta bin e noticia di un medio (Caribsich Netwerk) cu a bay averigua con e cos aki ta hinca den otro. Probablemente nan a pensa cu tabata straño cu burocratanan Europeo ta haci compromiso/promesa di e indole aki, mientras cu no tin ningun documento riba mesa ainda. Nos tambe a haya esey straño, pasobra di e experiencia cu tin den nos redaccion di e tipo di asunto aki, e burocracia Europeo ta conoci pa ta sumamente riguroso, cu dificilmente ta bay haci e tipo di promesa aki. Aparentemente esey a resulta di ta e caso, no tin compromiso pa un motibo masha simpel: no tin un peticion! Con bo kier pa un burocrata haci un trabao si e no tin nada den su man? Ademas cu na fin di e proceso di un peticion asina e burocrata ta duna conseho, pero e decision ta na otro nivel. Acaso aki na Aruba si a para bira asina cu tin cierto proceso gubernamental ta cana sin cu tin documento? Si esey ta asina ta bira tempo pa para e sorto di locura ey di inmediato.

Loke nos no ta comprende di henter e asunto aki ta: pakico? Pakico no a bisa e cos manera cu e ta. Bisa cu e grupo parlamentario a bay haci un bishita di cortesia na Bruselas, pa haci trabao preparativo, di ‘lobby’ pues, pa prepara tereno pa despues ehecutivo haci su trabao y percura pa un plan bon structura y teniendo cuenta cu e rekisito y custumbernan na Union Europeo. Riba esey, na su debido tempo, y no den pura, nos lo a haya contesta kico nan ta pensa. Purba pinta e panorama di manera diferente no ta sirbi ningun proposito sano y al final ta resulta contraproducente. Contal cu ta resulta awor cu nos ta para ainda na ‘square one’ y cu henter e proceso mester cuminsa ainda… Ki dia nos ta siña?

LJMADURO – 28-MAR-2019