A pesar di tur control y inspeccion haci pa e seccion di Higiena y Inspeccion di Alimento di departamento di Salud Publico, e calidad di awa uza pa agricultura ta keda un punto di preocupacion. Ya cu tin hendenan inconsciente cu ta contamina e awa aki cu ta wordo uza eventualmente pa cultivo di berdura y otro tipo di cultivo.

Directora di e seccion aki, Yvette Geerman a bisa cu di parti di departamento di Salud Publico pa locual ta e tereno micro biologico -cu tin di haber cu e bacterianan- nan ta percura pa e awa uza den agricultura sea uno optimal. Na momento cu e awa ta wordo entrega na Santa Rosa, ya caba e awa aki a wordo controla y e ta uno di calidad pa e cunukero por haci uzo di dje.

Sinembargo e ta haya cu e situacion aki ta keda un preocupacion. Por ta cu mester di mas informacion pa e agricultor riba e tereno aki pa nan sa mas den detaye ora cu nan ta referiendo cu e awa ta bon of e awa ta malo. Nan ta puntonan cu e ta considera cu mester amplia riba nan.

E awa cu e agricultor ta uza di Santa Rosa nan ta monitor tur luna. “E ta wordo monitoria. E tin supervision ariba dje.” Tin momentonan cu e cosnan por bay robes. Tin hopi factor cu no ta den man di e diferente departamento. Sra. Geerman a indica cu esun cu ta un punto di atencion ta entre otro e hendenan cu ta contamina e dam cu awa di pos. Esaki ta haci un efecto negativo.

Pero e ta insisti cu mester sigui traha conhuntamente cu e cunukeronan, pueblo y otro departamentonan, pa asina nan por entrega un bon producto final. “Esey ta e enfasis di departamento di Salud Publico. Ban traha hunto, pasobra e calidad di awa mester ta uno di bon calidad pa nan y pa pueblo en general.”

El a splica cu nan ta controla no solamente e awa cu Santa Rosa ta abastece e cunukeronan cu nan, sino varios dam rond Aruba. Nan ta 7 dam cu ta bou supervision di Santa Rosa conhuntamente cu e seccion aki di departamento di Salud Publico.

El a bisa cu tin mas dam na Aruba, pero nan ta supervisa 7 dam. Kiermen si awa ta wordo tuma di e damnan aki, ‘e awa mester ta di un calidad cu e agricultor por uza’. E damnan aki ta wordo controla 2 biaha pa luna