Durante reunion pa trata e presupuesto preliminar di aña 2018 ayera a resalta cu tabatin hopi envolvimento di parti di publico presente na tribuna.

Esaki a conduci presidente di parlamento Ady Thijsen (MEP) pa hala atencion di publico varios biaha, te cu a bin na discusion e colo politico di e publico.

Despues di lansa un cantidad grandi di preguntanan pa ministernan riba e presupuesto cu a keda entrega e luna aki pa aña 2018 e parlamentarionan a haya chens pa reitera riba nan preguntanan of pa hiba un discurso dilanti pa henter sala.

Presidente di parlamento sr. Thijsen mester a pone ordo varios biaha y demostra cu e tin e autoridad pa saca personanan den publico di parlamento en caso cu no cumpli cu reglanan di orden y respet. Esey el a menciona pa ilustra cu parlamento ta enfocando mas riba e respet cu e organo aki ta padece di dje.
Aunke sr. Thijsen a expresa cu su intencion no ta pa bay asina leu pa expulsa personanan, el a subraya cu e parlamento number 10 ta tene reglanan di respet sumamente na halto.

Colo politico den sala
Despues di mester a hala atencion varios biaha e publico a sigui lansa comentario den sala. Particularmente durante discurso di parlamentario y lider di fraccion di AVP Marlon Sneek(AVP) e publico a bay den furor pa cierto expresionnan di sr. Sneek. Na cierto momento sr. Sneek a trece na cuestion e colo politico di un gran parti di e audiencia y a yama nan pa simpatisante di partido MEP.

Aki lider di fraccion di MEP Rocco Tjon a trece atencion na esaki bisando cu ‘sr. Sneek no por a bay den stemhok cu e personanan den tribuna pa determina nan colo politico’. Aki un furor a cay den tribuna cu aplauso, pa asina sr. Sneek menciona cu den pasado simpatisantenan di AVP a yega di haci desorden den sala pues ‘bo no mester gaña bo mes’.

Aki sr. Thijsen mester a interveni pa evita cu un discusion surgi riba e punto aki pues e presidente a dirigi e discurso na e proximo punto.

“Si no nos tin cu haci esaki sin publico.”

Sr. Tjon a duna di su banda un compliment pa sr. Thijsen pa su dedicacion pa trece orden den sala, pero el a menciona cu ta dificil pa cambia algo cu pa añanan ta tumando luga ora tin topiconan fuerte como punto di ordo. “Mi ta kere bo no por cambia algo asina cu ta parti di cultura di un dia pa otro. Pero si bo por mustra cu bo ta pone un prioridad pa cuminsa cambia e manera con pueblo ta interactua cu democracia.”

Ora ministernan a cuminsa hiba nan discurso dilanti, sr. Thijsen mester a interveni un bes mas pasobra segun e presidente di parlamento tabata dificil pa tende loke minister di turismo, deporte y salubridad Dangui Oduber (MEP) tabata bisa.

“Na esunnan cu ta strob’e ta yega un momento unda mi ta pidi nos hendenan di KPA pa saca boso. Mi ta spera boso a scucha loke mi a bisa.” Sr. Thijsen ademas a subraya cu ainda ta keda par di dia pa trata e presupuesto aki pues tempo ta importante pa e tratamento di e topico. “Si no nos tin cu haci esaki sin publico.”