ORANJESTAD – Awe ta wordo conmemora Dia Internacional di Hende Muhe. E tema di e aña aki, pa duna contenido na e celebracion, ta: “Ban pensa den igualdad, Ban construi cu inteligencia, ban innova pa trece cambio.” Minister di finansa, economia y cultura, Xiomara Ruiz-Maduro hunto cu prome minister, Evelyn Wever-Croes, ta e dos ser femenino cu ta forma parti di un gabinete di shete minister.
Minister Ruiz-Maduro, contestando pregunta di Bon Dia Aruba riba e fecha importante aki, a trece su reflexion den cuadro di Dia di Hende Muhe. E ta un di e oradonan cu ta participa den un congreso bou e titulo Balansa pa Miho cu ta tuma luga den Renaissance Conference Center. Esaki ta e evento organisa pa gobierno pa asina duna contenido na e fecha aki.
E mandatario su mensahe den esaki ta bay ta cu: “Nos mester percura pa nos propio balansa.” E ta agrega cu hende muhe na Aruba tin hopi oportunidad, pero e problema ta cu tin biaha hende muhe na Aruba tin miedo di por asumi cierto posicionnan.
Algo cu semper el a yega di scucha relaciona cu e dia di awe ta cu no tin tanto hende muhe den puestonan ehecutivo. Tambe el a yega di scucha cu hende muhe no tin chens como ser femenino, ya cu esaki ta un mundo di homber.
Sinembargo e por wak cu na Aruba nos tin departamentonan importante di gobierno caminda hopi hende muhe ta na cabes di nan. Tambe historicamente Aruba tin un minister presidente femenino. Igualmente el a referi na su persona kende ta fungi como minister di tres ministerio. Un di nan ta finansa cu hopi biaha ta wordo ocupa pa un hende homber.
“Cu otro palabra, e ta haya cu como ser femenino, nan tin hopi oportunidadnan na Aruba,” el a bisa. Pues nos comunidad Arubano –segun e mandatario- ta brinda e oportunidad aki na tur hende muhe, pa nan tambe forma parti di e balansa cu nos kier wak.
E ta haya cu nos kier wak den politica mas hende muhe, pero hopi di nan tin miedo pasobra ‘nan ta bisa, esey no ta pa mi.’ E ta un forma pa hende muhe stroba nan mes di haya e balansa pa tin mas participacion politico di e ser femenino. A base di su propio experiencia e por bisa cu e hende muhe mes mester traha pa logra su metanan y asina traha e balansa pa nan mes.
Ademas, e ta considera cu apart cu nos por ta hende muhe of hende homber, e ta importante como ser humano pa wak kico nos por haci pa por yega na balansa. Esaki ta e mensahe cu e lo trece como mama y como minister dilanti den e congreso di awe mainta te merdia dedica na e hende muhe den su dia special. Ayera el a pronostica cu e dia di awe lo ta un dia bunita y inspirativo.
