“Loke mi por a wak generalmente den mi investigacionnan te cu awo ta cu un barera en contra percura pa sostenibilidad di negoshinan na Aruba ta cu banconan ta hopi conservativo. Cual ta haci mas dificil pa haya placa pa cuminsa un negoshi.”

Daniel van Heusden kende ta un di e studiantenan cu e aña aki ta participando cu e colaboracion di research entre Universidad di Aruba (UA) y University College Utrecht (UCU) ta splica Bon Dia con den entrevistanan cu empresanan cu metanan sostenibel den mente tanto como instancianan gubernamental e ta mira cu mas y mas tin interes pa sostenibilidad di negoshinan na nos isla.

Den e contexto di negoshinan, e desaroyo di metanan sostenibel ta cay den tres categoria, segun sr. van Heusden. E tres categorianan ta: impacto social di e negoshi, impacto ambiental di e negoshi y con sostenibel e negoshi mes ta den aspecto economico. Aunke den su entrevistanan e por a mira cu mas y mas negoshinan ta lantando teniendo metanan sostenibel pa aspectonan social y ambiental y te hasta mas negoshi tradicional ta integrando e metanan aki den aspecto economico ainda tin bareranan pa desaroyo di negoshi na Aruba.

Manera nos ta bin ta reportando, studiantenan na Universidad di Aruba y di UCU ta trahando riba nan tesis na Aruba pa asina envolve comunidad di Aruba den nan research y nan proceso cientifico. Manera nos a mustra ora nos a publica e storianan di Annemieke Drost, Nora Röders y Emmeline Long, e studiantenan ta buscando manera pa trece ciencia den un contexto mas social pa asina hisa participacion di nos comunidad den diferente dimensionnan social y ambiental.

E studiantenan lo presenta e resultadonan preliminar di nan investigacionnan cual ta inclui e strategianan di negoshinan chikito y mediano pa establece na caya grandi despues di e renobacionnan cu a tuma luga, e motivacionnan cu hende tin pa naturalisa na Aruba y desaroyo di industria creativo na nos isla, entre otro.

Sr. Heusden di su parti a investiga kico ta e bareranan y e facilidadnan cu tin pa empresanan y negoshinan na Aruba desaroya di un manera sostenibel, sea financieramente of teniendo cuenta cu nan impacto social y ambiental.

Bareranan

Algun di e bareranan aki ta cu banconan na Aruba ta hopi conservativo, segun sr. van Heusden a compronde di e empresanan cu el a entrevista. Esaki ta keda ilustra den e manera e banconan ta duna credito dificilmente pa industrianan pafo di turismo of real estate, asina creando bareranan pa negoshinan cuminsa den otro sectornan.

Ademas di esaki e por a mira te cu awo aunke su investigacion no ta finalisa cu e falta di experticio sea tecnologico of den otro aspecto ta dificil pa haya na Aruba mes, cual ta conduci por lo tanto na buscamento di personal di afo, sea di Merca of Hulanda.

Aunke esaki no ta barera exactamente, e fenomeno cu hopi Rubiano no ta bin bek despues di studia si ta crea cierto strobamento pa negoshinan sostenibel por florece na Aruba.

Un otro barera cu e studiante a menciona ta cu e proceso pa lanta negoshi na Aruba no ta exactamente simplifica. E ta conta nos con e manera con mester aprobacion di diferente departamentonan gubernamental pues cu no tin 1 luga unda bo tin cu bay pa lanta un negoshi ta algo cu ta seguramente impedi mas negoshi pa lanta segun el a mira den e entrevistanan cu el a tene cu diferente actornan. “Hopi di e personanan cu mi a papia cu nan a conta cu nan proceso cu burocracia pa lanta un negoshi no tabata imposibel pero siguramente e tabata algo cu ta tarda demasiado tempo.”

“E tardansa cu por yega te 6 luna of 1 aña pa lanta e negoshi ta haci cu hopi hende no ta sigui pasobra nan no tin e medionan financiero pa sostene nan mes mientrastanto.”

‘Cultura di entrepeneur cambiando negoshinan’

Aunke e studiante no por specifica cu kendenan el a combersa pa su tesis, el a conta nos cu el a papia cu servicionan di companianan cu ta facilita cierto aspectonan di lanta negoshinan. Esaki ta inclui institutonan cu ta otorga prestamo pa negoshinan cu ta cuminsando, oficinanan pa negoshinan y plataformanan creativo, entre otro. Pero tambe cu instancianan gubernamental y entrepeneurnan cu negoshinan enfocando riba sostebinilidad mes manera cultivadonan uzando tecnicanan hidroponico y companianan di reciclahe.

E impacto cu e companianan aki tin aunke no semper grandi den cifranan economico ta grandi pa motiva otro personanan pa cuminsa nan negoshinan, segun sr. van Heusden. “Riba un isla manera Aruba mi ta kere e pensamento di sostenibilidad ta halto riba hopi hende su lista di prioridad pasobra depende di otro paisnan no ta hopi sostenibel. Tin hopi iniciativanan cu kier pa Aruba depende menos di afo. Esaki ta un chispa cu mi ta kere ta inspira un candela pa personanan cuminsa nan propio iniciativanan.”

Negoshinan di e tipo aki no tin mucho historia na Aruba di loke sr. van Heusden por a mira, pues e ta haya cu awo nan ta lantando e fundeshi. Y te hasta companianan cu antes no tabata pone enfasis riba sostenibilidad e ta mira cu awo ta mas y mas interesa den e diferente dimensionnan cu esaki ta trece cu esaki.

E resultadonan preliminar di e investigacionnan lo keda presenta mañan na Universidad di Aruba di 3or pa 6or. Entrada ta gratis pa henter publico.