WILLEMSTAD – Fraccion di Movementu Futuro Kòrsou (MFK) sa di por lo menos un grupo serio encabesa pa un comerciante yiu di Corsou cu a entrega un carta cu un proposicion concreto pa tene nos refineria habri te ora cu haya un solucion riba termino largo pa nos refineria por keda draai.
E grupo aki ke y por trece un maximo di 250.000 bari di crudo pa dia for di Nigeria pa ser procesa den nos Refineria. No mester paga niun depchi pa esaki. E compania aki riba nan propio costo ta trece e crudo Corsou. Na refineria Isla e crudo ta wordo destila y procesa y e productonan final lo wordo entrega na e grupo pa nan por bende esakinan riba mercado internacional. Pa e operacion aki refineria ta cobra tur gasto cu mester pa destila y procesa e crudo aki. Pues tur costo di operacion, mantencion, salario di tur trahado y di contratista, etc., un sorto di “Cost Center”.
E grupo en principio kier haci esaki pa yuda nos gobierno y nos refineria pa tene cabes riba awa y paga tur trahadonan te ora cu bini cu un solucion structural. Pero locual a sosode te cu awor ta un wega di schuifmento y a keda manda e grupo aki di cashi pa muraya. Ni sikiera a haci e esfuerso pa sinta cu e grupo pa wak si ta cos serio y kico nan por nifica pa Corsou den e situacion cu nos ta actualmente. Pa ta mas concreto e grupo a manda un carta cu nan proposicion pa presidente comisario di RDK señor Gilbert Martina. Esaki a pasa e bala (carta), pa e director interino señor Marcelino de Lanooy. Esaki na su turno a pasa e bala (carta) pa directora di refineria Isla S.A., alegando cu ta refineria Isla ta e operador y cu ta nan tin cu atende cu e grupo. Den teoria tur tin rason, pero den practica cada un t’ey pa move nan coy sinta na bienestar di nos comunidad.
Hopi tristo cu nos no ta mira un esfuerso serio y sincero di parti di gobierno of esunnan cu gobierno a pone na cabes di e entidad aki cu ta Refineria di Corsou. Na luga di nan haci un esfuerso mas aya y bay un “Extra Mile” y ta sirbi como un facilitado den e solucion. Esunnan responsabel pa e trayecto di nos refineria ta simplemente hunga wega di cashi pa muraya cu futuro di hopi famia cu ta riba un hancha pa tene refineria habri pa nan por sigui pone pan riba mesa pa nan famia.
