Parlamentario Tromp-Lee a participa na reunion cu CEO y algun miembro di staff di AAA NV. Topiconan tabata entre otro COVID-19, proceso di reorganisacion y proyeccionnan a termino corto y largo.
Dia 24 di juni 2020 Comision Fiho di Turismo a ricibi un presentacion di AAA NV caminda entre otro e impacto di COVID-19 riba e compania a keda presenta y alabes proyeccionnan pa futuro. Na final di e reunion Tromp-Lee a puntra specificamente si AAA lo mester retira hende. Segun Tromp-Lee contesta cu e la ricibi ta cu esaki no ta e caso. Pesey mes cu hopi asombro el a tuma nota den medionan di comunicacion, cu ni un luna despues, AAA NV tabata ofreciendo empleadonan pakete di retiro boluntario. Pa Tromp-Lee e timing di AAA NV, cu ta un compania estatal, no ta corecto.
Aruba ta memey di un situacion di crisis, caminda Gobierno di Aruba mes no ta honra ningun peticion pa retiro door cu Gobierno mediante subsidio di salario kier percura pa mantene mas tanto trahador posibel na pia di trabou y cu un entrada. Como un compania estatal lo a spera cu AAA NV lo a sigui ehempel di gobierno. Adicionalmente mediante un carta fecha 18 di augustus 2020 Minister di Turismo, Salubridad publico y Deporte a manda un carta caminda e la vocifera claramente opinion di Gobierno como unico accionista pidiendo pa pone e ‘afvloeiingsplan’ aki on hold.
Durante e reunion di dia 22 di september 2020 caminda nos a trata e proceso di reorganisacion, mescos cu mi, mayoria di parlamentario presente a cuestiona e decision tuma door di AAA NV y mas cu claro a haci diferente pregunta relaciona cu e reorganisacion. Sigur a keda enfatisa door di Tromp-Lee cu e timing no lo ta uno corecto.
Mirando cu tin pregunta, segun Tromp-Lee, riba cua no a ricibi un contestacion satisfactorio, e la haci uzo di su derecho como Parlamentario pa haci preguntanan por escrito na Minister di Turismo, Salubridad Publico y Deporte pa por ricibi un contestacion por escrito y alabes pa haci un apelacion na minister pa atende cu e situacion aki cu AAA NV.
