Activista climatico Sueco, Greta Thunberg ta nombra como e persona di aña di Time, convirtiendo cu su 16 aña di edad den e persona mas hoben na ken e revista Mericano ta duna e titulo.
Thunberg a surgi como e cara di accion climatico hubenil despues cu el a cuminsa ta ausente na scol un bes pa siman, pa protesta pafo di Parlamento di su pais. Den ultimo aña y mey, el a atrae gran multitud na conferencia y manifestacion internacional pafo di Suecia.
Algun a ricibi di bon forma e activismo di Thunberg, incluyendo su discurso desafiando lidernan mundial pa stop keintamento global. Otro ta critica e tono combativo di e hoben.
Pa bati alarma tocante e relacion depredador di humanidad cu e unico cas cu nos tin, pa trece un bos cu a trascende frontera y background den un mundo fragmenta, pa mustra nos tur con ta mustra ora un generacion nobo ta lidera, Greta Thunberg ta e Persona di Aña 2019 di Time, e revista a bisa ayera riba su website.
Despues di conferencia climatico di Nacionnan Uni na Madrid unda el a dirigi su mes na negociadonan, Thunberg a bisa The Associated Press cu ta ‘poco sorprendi’ pa e reconocimento di Time, cual el a dedica na tur hoben activista.
Thunberg a bisa cu tin speransa cu e mensahe di urgencia cu e y otro activista ta comunicando – cu nan gobierno mester aumenta nan esfuerso pa combati e cambio climatico – finalmente ta alcansando otronan.
El a bisa cu e experiencia den ultimo 15 luna, bayendo di su manifestacion solitario pafo di Parlamento di Suecia pa awo dirigi su mes na lider mundial di Asamblea General di ONU, a cambi’e. “Mi ta kere bida ta mucho mas significativo awo cu mi tin algo cu a crea un impacto”, Thunberg a bisa. E tin planea pa bay bek Suecia pa tuma descanso den dianan di fiesta. “Si bo no tuna un break, bo no ta capaz di continua”, el a bisa.
