(AP)—TikTok Inc. y un grupo di cinco artista riba e app (“content creators”) cu ta lantando caso contra e estado di Montana pa via di un ley cu ta prohibi e uzo di e app ta puntrando un hues federal pa blokia e implementacion di e ley mientras cu e caso ta den proceso ainda y prome cu esaki tuma efecto den januari otro aña.
E peticion separa pa e interdictonan preliminar a ser entrega diaranson den corte federal na Missoula. E casonan cu ta desafiando e ley a ser entrega na mei y desde esey ta consolida pa e Hues di districto, Donald Molloy.
Abogado di Estado pa Montana, Austin Knudsen, a crea e legislacion pa preocupacionnan—comparti pa e FBI y Secretaria di Estado, Antony Blinken—cu e app, ken ta di un compania Chines yama ByteDance, por ser uza pa permiti gobierno Chines pa tin acceso na informacion di ciudadanonan Mericano of pa pusha informacion pro-Beijing incorecto cu por influencia e publica. TikTok a bisa esaki no a pasa nunca.
E mocionnan pa interdictonan ta haci e mesun argumentonan manera e casonan contra e estado—cu e prohibicion ta un violacion di e constitucion pa derecho di duna bos na propio opinion y cu e estado no tin autoridad pa regula asuntonan den exterior.
Abogadonan na ambos banda ta di acuerdo di un cronogram cu ta mustra cu e estado mester responde na e mocionnan pa mey augustus y pa e demandantenan entrega nan contesta pa mey september, segun e historia di corte.
E compania y e artistanan di e estado a argumenta cu un interdicto preliminar mester ta aproba pasobra e demandantenan tin hopi chens pa gana den nan caso contra e ley y si e prohibicion tuma luga, esaki lo causa daño ireparabel pa medio di kita nan habilidad pa expresa nan mes y comunica cu otro.
TikTok tin personal pa modera contenido y proteha muchanan menor di edad, y no lo comparti informacion cu China, e compania a argumenta. Pero criticonan a subraya China su ley nacional di inteligencia di 2017 cu ta ordena compania pa coopera cu e gobierno di e pais pa trabao di inteligencia di estado.
“Usuarionan di TikTok no ta uza e app—e app ta uza nan y ta converti nan den aparato pa spionahe pa e Partido Comunista di China,” segun Emily Flower, un vocero pa e oficina di Abogado di Estado, a bisa den un declaracion cu tambe a tuma nota di reportahenan recien cu TikTok ta pagando pa e caso lanta pa e artistanan. “E apoyo di TikTok ta paga—residentenan di Montana ta reconoce e menasa cu e app ta pa nan privacidad y seguridad nacional.”
Mas cu mita di e estadonan na Merca, incluyendo Montana, y e gobierno federal a prohibi TikTok for di aparatonan di gobierno.
Gobernador Republicano, Greg Gianforte, a firma e legislacion den ley na mei, bisando cu Montana tabata tumando “e accion mas decisivo di cualkier estado pa proteha e data di priva di residentenan y informacion personal sensitivo pa ta colecta pa e Partido Comunista di China.”
Cuminsando 1 di juni, Gianforte tambe a prohibi e uzo di cualkier app di media social cu ta conecta cu oponentenan den exterior riba ekipahe di estado y pa negoshinan di estado. Entre e appnan cu el a pone riba, esaki ta inclui WeChat, di ken su compania mayor ta basa den China, y Telegram Messenger, cual a ser estableci na Rusia.
