(AP) – TikTok a bisa cu nan lo stop nan operacion di benta online na Indonesia riba diamars pa cumpli cu decision di e pais pa prohibi transaccionnan di e-commerce riba plataformanan di medionan di comunicacion social – un golpi grandi pa e mercado cu mas crecemento di e plataforma di video aki.
Gobierno di Indonesia a anuncia e regulacion nobo, cu ta prohibi companianan di medionan di comunicacion social pa facilita benta di productonan riba nan plataformanan, riba 28 di september, den un esfuerso pa proteha e negoshinan chikito for di competencia di e-commerce, acusando e aplicacionnan popular y websitenan di prijs di predatorio.
E aplicacion di compartimento di video cu ta pertenece na un compania Chines a bisa den un declaracion cu nan lo stop di facilita bentanan di e-commerce na e TikTok Shop Indonesia pa 5or di atardi riba diamars.
“Nos prioridad ta pa keda cumpli cu ley- y regulacionnan local,” e declaracion cu nan a publica ariba nan website diamars a bisa.
Minister di Comercio di Indonesia, Zulkifli Hasan, a bisa cu e prohibicion ta tene cuenta cu “prevencion di dominio di algoritmo y prevencion di uso di datonan personal pa interesnan comercial” y pa “crea un ecosistema di comercio elektronico husto, saludabel y beneficioso”, segun un declaracion publica pa e Ministerio di Comercio ora nan a anuncia e prohibicion. E declaracion a bisa cu mercado- y bendedornan solamente por ofrece of promove producto y servicio.
Un siman prome cu nan anuncia e prohibicion, e mercado mayorista mas grandi di e Sudeste di Asia, Tanah Abang, a ricibi bishita pa inspeccion. Bendedornan na e mercado na e capital, Jakarta, tabata experenciando mas di 50% di perdida di ganashi pasobra nan no por a competi cu productonan importa cu ta wordo bendi online pa prijsnan hopi mas abao, segun Minister di Asociacionnan y Negoshinan Chikito y Mediano, Teten Masduki.
El a bisa cu TikTok tabata envolvi den prijs predatorio cu a causa daño na negoshinan local chikito y mediano, y cu e regulacion nobo “lo regla hustamente e comercio online y offline.”
Dianan despues cu nan a anuncia e prohibicion, TikTok Indonesia a bisa cu nan ta lamenta e decision di gobierno—particularmente pa e impacto cu esaki lo tin riba e miyonnan di bendedor cu ta usa TikTok Shop. Pero e compania a bisa cu nan lo respeta e regulacionnan y “lo tuma un rumbo constructivo.”
Sudeste di Asia, un region na unda mas di 675 miyon hende ta biba, ta un di e mercadonan mas grandi di TikTok den termino di cantidad di usuarionan, generando mas di 325 miyon bishitante pa luna riba e aplicacion.
TikTok, cu ta den posesion di ByteDance di China, tambe ta khayando atencion for di algun gobierno y regulador debi na e preocupacion cu Beijing por usa e aplicacion pa captura datonan di usuarionan of pa avansa nan interasnan. Paisnan manera Merca, Reino Uni y Nueva Zelanda a prohibi e aplicacion riba telefononnan di gobierno, a pesar cu TikTok a nenga repetidamente cu nan a comparti datonan cu e gobierno Chines y nan no lo hasi esaki si nan a wordo puntra pa haci’e.
