TikTok ta purbando di elimina un video grafico circulando e app cu ta mustra un homber tirando su mes cu un arma di candela. E compania tambe ta suspendiendo cuentanan di hende cu ta re-upload e clip.
TikTok ta bisa cu originalmente a transmiti e video riba Facebook y tambe a aparece riba otro appnan. Mientras e comunidad di TikTok a bira consciente di e clip, hopi creadornan a cuminsa post videonan advertiendo nan siguidonan pa keda alerta pa un imagen – un homber sinta dilanti di su mesa cu un barba shinishi – y swipe pa kita e video. Otro creadornan a papia tocante e parti mas horibel di e video siendo sconde paden di videonan cu ta mustra mas inocente.
Un representante di TikTok a bisa The Verge cu ‘clipnan di un suicidio’ a cuminsa circula diadomingo anochi.
“Nos sistemanan automaticamente ta detectando y marcando e clipnan aki pa violacion di nos politicanan contra contenido cu ta mustra, elogia, glorifica of promove suicidio”, e vocero a bisa. “Nos ta suspendiendo cuentanan cu repetidamente ta purba di upload clipnan y nos ta aprecia nos miembronan di comunidad cu a reporta contenido y adverti otronan contra mira of comparti videonan asina riba cualkier plataforma, pa motibo di respet pa e persona y nan famia.”
E sorto di video aki a aparece riba otro websitenan den pasado, incluyendo Facebook, Instagram y Reddit. Ya cu videonan di TikTok ta aparece riba un ‘feed’ principal – conoci como e For You Page – cu hende ta pasa door, por ta dificil pa evita e imagennan. Esey por splica pakico comunidad di TikTok ta purbando di ta extra-cauteloso tocante adverti otronan pa e imagen den e video. Advertencianan tambe a cuminsa aparece riba Instagram, unda clipnan di e video ta circulando. Riba Twitter, mayornan a papia tocante mucha- y adolescentenan encontrando e video, y e daño cu esaki a causa.
“Si tin hende den nos comunidad luchando cu pensamentonan di suicidio of preocupacion tocante un hende cu ta luchando contra esaki, nos ta curasha nan pa busca sosten, y nos ta duna acceso na hotline directamente riba nos app y nos Centro di Siguridad”, e vocero a bisa.
