(NLTimes) – TikTok a haya un boet di 345 miyon euro di parti di Data Protection Commission na Irlanda a causa di fracasa den proteccion di data di muchanan y e plataforma di red social su usuarionan menor di edad. E boet a keda determina dia 1 di september y a ser anuncia publicamente diabierna.

E caso aki a ser lansa parcialmente bao peticion di Dutch Data Protection Authority despues di nan propio investigacion tocante e plataforma di dos aña atras. E boet a ser otorga na TikTok Technology Limited, e plataforma su controlador di data pa usuarionan den e European Economic Area y Swizterland desde juni 2020. E entidad ta oficialmente basa na Dublin. E investigacion Irlandes a cubri e periodo di juli 31 2020 te fin di e ana aki pa determina si TikTok ta den cumplimento cu e Union Europeo su rekisitonan ora di trata data personal di muchanan menor di edad.

E regulador Irlandes a haya cu TikTok ta den violacion di 10 diferente seccion di GDPR. Entre nan, e cuentanan di muchanan menor di edad ta automaticamente publico, cual ta duna tur hende acceso na e contenido cu e muchanan publica sin importa si e persona cu mira e contenido tin un cuenta riba TikTok of no. Esaki no solamente a pone den peliger e muchanan di 13 aña, sino tambe esunnan mas hoben cu logra haci uso di e aplicacion.

Ademas di esaki, e adultonan facilmente por conecta nan cuenta na esun di un mucha, hasta si e adulto no ta verifica di ta un mayor of persona responsabel legalmente. Usando TikTok su Family Pairing, e adulto ta haci posibel cu por manda mensahe cu e muchanan for di e edad di 16 aña.

Autoridadnan na Irlanda tambe a bisa cu TikTok a crea un plataforma unda ta motiva usuarionan acepta opcionnan cu ta mas invasivo ora di crea un cuenta y despues publica un video. E compania a tambe a keda acusa di ta intencionalmente vago den provee informacion na muchanan menor di edad tocante e plataforma y nan cuentanan.

Den un declaracion di media, TikTok a bisa cu e preocupacionnan cu Irish Data Protection Commission (DPC) a trece dilanti ya caba a ser trata den comienso di 2021. “Nos ta den desacuerdo cu e decision, particularmente e nivel di e boet cu a impone,” vocero di TikTok a declara. E compania tabata considerando su opcionnan den e decision di apelacion.

“DPC su criticanan ta enfoca riba funcionnan cu tabata den luga 3 ana atras y nos a haci cambio na esaki prome cu e investigacion a cuminsa, manera haci tur cuenta bao di 1 aña priva automaticamente.”

Den ana 2021, Dutch Data Protection Authority a duna un boet di 750,000 euro a causa di solamente provee un declaracion skirbi den ingles na muchanan Hulandes. E investigacionnan tocante TikTok a “revela mas problemanan den privacidad durante e tempo aki,” cual a sali na luz den e caso Irlandes, segun e autoridad Hulandes a bisa riba diabierna.

Irlanda despues a ser puntra pa revisa e autoridad Hulandes su resultadonan inicial, pa conduci su propio investigacion y impone un sancion si suficiente evidencia surgi pa haci esaki. Autoridadnan Hulandes a haci e peticion pa motibo cu TikTok a habri su oficina na Irlanda den aña 2020. Dutch Data Protection Authority “no tabatin autorisacion mas pa haci un decision tocante un gran parti di e resultado di e investigacion.”

Aña pasa, un version di Irish Data Protection Commission su decision a keda entrega na tur autoridadnan di supervision relevante na Europa.