Tik Tok tin su impacto riba muchanan y hobennan

A calcula cu un mucha of un hoben ta pasa casi 75 minuut pa dia riba Tik Tok, un di e rednan social di moda. E datonan aki mester hala atencion, ya cu e uso di e plataforma aki ta facil, no solamente pa wak video y retonan, sino tambe pa haci nan como “challenges” cu por pone e muchanan den riesgo.

No ta mucho cos loke ta wordo implica pa usa Tik Tok: un telefon, señal di internet y un minuut di bida ta suficiente pa crea un video den e app aki. Despues ta sigui haci mas y mas, pa ora e persona ta bin realisa, el a wak mas di 60 minuut caba di videonan.

Segun psicologonan cada bes mas hobennan incluyendo muchanan ta haci uso di e red social aki, no solamente pa wak videonan sino tambe pa imita y despues post nan.

‘Challenge’ ta wordo defini como un situacion dificil of peligroso cu e persona ta enfrenta riba internet, no tin un riesgo cu mas impacto negativo den e muchanan cu e retonan viral.

Aunke esaki por parce weganan simpel y di amigonan, e datonan ta indica cu hopi di nan ta bira un riesgo grandi, loke ta produci lesionnan severo y incluso por pone den peliger e bida di e muchanan.

Loke na comienso tabata sucede na otro paisnan, recientemente ta imponiendo cu hopi forsa den nos sociedad, influyendo den e muchanan y hobennan cu di un manera facil por haci e weganan peligroso. No tin edad minimo rekeri pa usa Tik Tok, pero e plataforma aki no tin manera pa comproba cu e datonan cu ta wordo introduci den dje ta berdad, cu muchanan menor di 13 aña ta utilis’e sin dificultad. Akinan nos ta papiando di un etapa vulnerabel, unda e mucha ta laga un banda e parti di ta mucha, pero te ainda e no ta adulto.

Esey ta un etapa di transicion, den cual ta existi hopi cambio no solamente na nivel fisico sino tambe na nivel neuro-psicologico, ya cu e celebro di e muchanan aki ta den pleno desaroyo, unda por cambia y adapta su mes na su entorno; auto-control no ta existi den edadnan aki, loke ta haci cu nan ta actua sin midi e consecuencianan.

Un otro factor importante pa considera ta e necesidad di aceptacion, di aprobacion, den cual e personalidad di e adolescente ta den formacion, pa lo cual mester un identidad. Den e etapa aki e ta busca pa e wordo acepta of pa sinti cu e ta pertenece na un grupo ta importante pe.

Esaki ta wordo traduci cu mientras mas likes y mas popular lo bira, e ta wordo acepta den e sociedad, loke ta causa cu e por haci cualkier cos, sin importa e riesgonan o peligernan cu tin, pa haya e mayor cantidad posibel di likes.

E likes aki ta controla su estado di animo, su actividadnan y su bida, e satisfaccion cu un red social ta brinda ta genera mas independencia na dje.

Si un mucha ta crece cu un telefon como “babysitter”, e bashi emocional ta bay ta mas relevante y e necesidad di cubri esey tambe. Lastimamente, nan ta busca refugio den tecnologia y den e caso aki den e rednan social, unda tin mayornan cu no tin control riba e tempo cu nan yiu ta pasa interactuando riba e rednan social.

Durante pandemia, un rapport a sigura cu actividadnan online a aumenta 180% durante e prome siman di aislamento, mientras cu uso di medidanan di vigilancia di parti di e mayornan a aumenta solamente un 6%, un cifra alarmante.

Otro consecuencia negativo tin relacion cu problemanan di comportacion, e rendimento na scol ta baha y nan ta haya problemanan di atencion y di concentracion.

Ta importante pa menciona cu esaki no ta responsabilidad di e hoben y mucho menos di e mucha, tampoco di su scol; e responsabilidad ta di e mayornan, unda cu nan mester adverti constantemente riba e peligernan cu nan por haya riba rednan social. Esaki lo permiti pa nan mes tuma e decision apropia pa loke ta trata videonan cu kier wak of kier haci.

Un otro punto cu ta destaca ta cu mayornan mester conoce cua ta e actividadnan cu nan yiu ta haci riba diferente plataforma, kico nan ta comparti, cu ken nan ta papia y ki tempo nan ta dedica pa esey.

Ta importante pa pone limitenan, pa nan no surpasa e tempo riba rednan social, pa no mira videonan no adecua pa nan edad, pa nan haci algun deporte cu ta faborece e crecemento y e desaroyo, pa nan acerca mas na nan mayornan y evita dependencia tecnologico.