Tiendanan di futuro lo kier tuma un pagina di nan rivalnan online, habriendo brasa pa tecnologia – cu tur cos di robotnan cu ta yuda pa spielnan interactivo cu sensornan. Companianan ta probecha di CES (Consumer Electronics Show) pa ilustra e tecnologianan nobo cu nan lo trece riba mercado pronto.
E meta: uza esaki pa atrae cumpradonan bek di internet, y podise yuda nan gasta un tiki mas.
Amazon su tienda nobo experimental na Seattle, cual ta habri na comienso di aña 2017, lo laga cumpradonan cumpra productonan sin tin mester di para den liña pa paga. Sensornan lo ‘track’ articulonan cu nan tin den nan macutunan of pone nan bek riba reki. E cumpradonan nan cuenta di Amazon lo wordo cobra automaticamente.
“Amazon, pa bon of malo, ta habriendo caminda”, Robert Hetu, director di investigacion na Gartner Research. “Cada negoshi lo reaccion na un manera of otro. Pero e lo no ta pa tur manera ‘one-size-fits-all.”
Kroger, Neiman Marcus y Lowe’s ta entre e companianan cu ya ta experimentando cu tiendanan futuristico. Robotnan, por ehempel, lo por yuda guia cumpradonan pa e rij corecto, mientras cu algun app lo por yuda bo mira con cierto color di verf en particular lo keda den bo sala – of con un par di jeans lo keda bo. Hopi di e tecnologianan aki lo wordo divulga durante e show di CES na Las Vegas, cual a cuminsa diamars.
Robotnan
Amazon y otronan a uza robotnan den nan depositonan pa hopi tempo, pa yuda cu pakinan y manda ordo.
Lowe’s ta haciendo prueba cu robotnan na un di su tiendanan na San Jose, California, y ta planea di manda pa 10 tienda mas e aña aki. Banda di scan e rekinan pa inventario, e robotnan por guia clientenan pa productonan specifico, tanto na Ingles como Spaño.
Spielnan interactivo
Tiendanan di paña ta haciendo prueba cu spielnan interactivo den nan cambernan pa pas, un luga clave caminda cumpradonan ta dicidi pa cumpra of no.
Neiman Marcus a instala e spielnan aki na 20 tienda, pa ofrece clientenan un bista di 360 grado di con e paña a keda nan. Clientenan por haci un comparacion banda di otro, sin mester pas tur. Tambe nan por comparti e video cu nan amigonan pa haya opinion.
Samsung
COO di Samsung America Tim Baxter a habri un conferencia di prensa cu masha fanfaria diaranson, admitiendo cu 2016 tabata un aña cu reto debi na e problemanan cu e Galaxy Note 7. E compania su celular tabatin un ‘recall’ debi cu e tin e tendencia di explota na candela.
Baxter a bisa cu e compania ta investigando e problema y cu e compania lo comparti e reis di e problema pronto.
E resto di e conferencia a ilustra Samsung su productonan nobo manera nan television cu tecnologia Quantom Dot, cu yama QLED, cual tin un imagen mas skerpi y mas colorido cu otro televisionnan. Nan ta añadiendo un control di stem na nan frishidernan ‘smart’, cual ta ilustra e tema di control di stem cu por mira hopi durante CES te awo.
Wash-dryer
Tambe Samsung ta introduciendo un ‘washer-dryer’ combo cu por laba den tek separa pareu mientras e ta secando un tek regular y articulonan delicado separa. Asina bo por laba paña blanco y preto pareu. E aparato tambe ta traha riba Wifi.
E productonan aki y hopi mas cu ta wordo presenta durante e conferencia aki, lo por ta riba nos mercado local pronto. Ta un cuestion di warda y wak si en berdad nos ta cla pa, por ehempel, asistencia di robotnan ora cu ta cumprando paña.
