Den un entrevista pa Bon Dia Aruba Rhomyko Winklaar, director di e organisacion Tienda

di Educacion, ta conta di e trabounan di e organisacion, con aña 2022 a bay pa nan y kico ta nan expectativanan pa 2023.

Tienda di Educacion ta un organisacion cu tin como meta brinda sosten y guia na mayornan cu tin yiu di 0 pa 18 aña di edad ora cu ta trata di desafionan.E organisacion a cumpli 10 aña di existencia e aña aki y desde inicio te cu awor e organisacion a brinda mas di 350 tayer na comunidad di Aruba a yuda mas na mas di tres mil ocasion.

E organisacion ta traha riba prevencion di abuso di mucha y pa esaki nan a bin cu e idea pa lanta un liña di telefon caminda cu mayornan por acudi of por yama pa ricibi guia y sosten ariba e tema di lantamento di mucha den un forma anonimo, vooral ora ta trata preguntanan cu ta surgi na momento cu un mucha no ta comporta su mes.

Winklaar a splica cu hopi biaha e muchanan ta pasa den cierto fasenan y mayornan no sa con pa maneha esaki. “Semper nos ta sali di punto di bista cu muchanan ta nace y nan no ta bin cu un manual. Na e momento ey como mayor bo no sa con pa haci, ni si bo tin mas yiu, nan no sa e desaroyo cu e mucha ta bin cune pasobra tur mucha, cada individuo ta diferente y p’esey nos t’ey pa yuda e mayornan”, el a remarca.

Aña 2022 tabata un aña exitoso pa Tienda di Educacion, Winklaar a comenta. E organisacion tabatin hopi alcance den comunidad. El a conta cu nan a duna hopi tayer pafo, pa scol, pa mayornan tambe naturalemnte, pa diferente organisacionnan y nan a forma parti di diferente carrousel di informacion pa asina tur hende por sera conoci cu nan organisacion.

Pero esey no ta kita cu e desea pa yuda mas hende posibel semper t’ey. “Nos ta desea pa esaki yega na mas, nos sa cu bida ta druk y nos ta purba tambe di acopla y yega na e mayornan di un forma cu nos por duna nan e informacion aki na nan tempo, na momento cu nan mester di esaki. Hopi biaha esaki ta a traves di scolnan. Y nos ta desea hopi mas pa mayornan haya e informacion di un forma of otro”, el a indica.

Pa loke ta trata e expectativanan pa otro aña Winklaar a splica cu nan kier yega na mas mayornan y nan ta desea naturalmente pa mayornan tuma contacto cu nan na momento cu nan mester di esaki. “Nos ta anonimo. Hopi biaha berguensa ta hunga un rol grandi, p’esey nos di 161 ta anonimo y mayornan no mester duna nan number si nan no ta desea esey”, el a finalisa.