Tienda di Educacion ta un organisacion cu tin como meta brinda sosten y guia na mayornan cu tin yiu di 0 pa 18 aña di edad ora cu ta trata di retonan. E organisacion a cumpli 10 aña di existencia aña pasa y desde inicio te cu awor e organisacion a brinda mas di 350 tayer na comunidad di Aruba a yuda mas na mas di tres mil ocasion.
Recientemente director di e organisacion, Rhomyko Winklaar, a splica na algun medio di comunicacion local, con temporada di Pasco, aña nobo y aworaki carnaval por afecta e cartera y presupuesto di mayornan fuertemente.
Winklaar ta indica cu berdad aña nobo a habri y cune temporada di carnaval a yega despues di dos aña, pero e parti cu hopi hende ta lubida riba dje ta cu mester tin un budget pa luna, specialmente mirando cu luna di januari ta mustra mas largo cu otronan pasobra hopi hende ta haya nan salario prome cu dia di Pasco yega. Aworaki, cu ya caba algun siman a pasa y ainda hopi hende no a cobra salario ainda, por mira cu hopi mayor tin dificultad den e area aki.
“Ta importante pa traha riba un presupuesto y nos kier pone enfasis pa conscientisa mayornan pa bay un poco cauteloso cu nan entrada y recorda cu e muchanan ta e prioridad, nos ta pone esey na pecho, e derechonan di mucha, caminda cu muchanan no por sali perhudica,” Winklaar a remarca.
El a enfatisa pa mayornan tene cuenta ora ta bay actividadnan, por ta actividadnan carnavalesco of un actividad publico, pa no malgasta e placa y despues no tin pa por sobrevivi e resto di e luna.
Winklaar a sigui splica cu Tienda di Educacion ta traha cu organisacionnan cu por yuda y guia mayornan cu tin mester di ayudo pa structura nan presupuesto mensual pa asina por cubri tur gasto necesario, mirando e aumento di costo di bida, pa asina no tin necesidad di pasa den simannan fuerte pa motibo di falta di placa.
Den un entrevista anterior cu Bon Dia Aruba, Winklaar a indica cu aña 2022 tabata un aña exitoso pa Tienda di Educacion, Winklaar a comenta. E organisacion tabatin hopi alcance den comunidad y el a conta cu nan a duna hopi tayer pafo, pa scol, pa mayornan tambe naturalmente, pa diferente organisacionnan y nan a forma parti di diferente carousel di informacion pa asina tur hende por cera conoci cu nan organisacion.
Pa loke ta trata e expectativanan pa e aña Winklaar a splica cu nan kier yega na mas mayornan
y nan ta desea naturalmente pa mayornan contacta nan na momento cu nan mester di esaki. “Nos
ta anonimo. Hopi biaha berguensa ta hunga un rol grandi, p’esey nos di 161 ta anonimo y
mayornan no mester duna nan number si nan no ta desea esey”, el a subraya.
