Dianan ta sigui pasa, y ainda famianan tin cu keda cera na cas. Esaki ta ocasiona stress pa mayornan, kende por perde trabou pa un periodo, y tambe muchanan cu actualmente no tin scol, mirando e situacion di pandemia di coronavirus.
Corina Linssen, coordinador di Tienda di Educacion, a duna di conoce cu en berdad nos ta pasando den temponan dificil, y tur hende ta pasando den dificultad pa adapta nan mes, algo cu ‘nos ta compronde completamente’.
Nunca den ultimo temponan a confronta un situacion asina, unda cu muchanan y hende grandi mester keda na cas henter dia. Linssen ta bisa cu cada famia lo mester busca un structura nobo den cas, pa asina keda trata cu otro.
Segun Linssen, structura kiermen cu mester sigui lanta mainta y wak con e dia ta cana. Lo mester traha un plan pa e dia y pa e siguiente dianan, mester ‘tin un plan pa siman’. Di e forma aki, mayornan por curasha e muchanan pa pinta plan pa por haci diferente cos na cas.
Cu un plan diferente pa cada dia, Linssen ta bisa cu por desayuna hunto, cana den bario (pero no den grupo grandi). Por haci uso di naturalesa. Den caso cu mester haci ehercicio pa salud y mantene activo, por haci esaki tambe. “Mester percura pa haci ehercicio”, algo cu ta conta tanto pa adulto como pa mucha.
Un punto importante cu Linssen a menciona, ta ora cu un mucha no por haci movecion. “E ta bira mas druk”, locual ta causa cu e ta duna e mayor mas stress. Pues por sigui cu e stap cu ta duna pa por relaha, pero semper cumpliendo cu regla, di bay un luga unda no tin hende y unda ta keto.
Otro tip ta cu por haci wega di mesa, trabou na cas di un manera mas agradabel, famianan por cushina hunto. “Tin hopi actividad cu por haci cu mucha”, no mester keda henter dia ta wak television of riba weganan di tablet. “Esey por, pero no henter dia.”
Linssen ta menciona cu mester pone structura di cuanto tempo ta dedica na cada actividad. Planea haci algo cu bo yiu, tambe wak kico nan ta mira y ki wega nan ta bezig cune. Ademas por haci diferente tarea den cura di cas.
Tur actividad ta crea un motivacion den e mucha pa ta mas activo. Tambe canta cantica of karaoke. Pa hoben di un edad mas grandi, tambe ta importante pa duna nan e oportunidad pa expresa nan mes, segun Linssen. Mester permiti nan por papia di e situacion cu examen di scol, of si tin stress pa motibo cu kier sigui nan estudio. Esaki ta un oportunidad tambe pa por reflexiona y pensa ki estudio nan por scoge.
“Laga nan expresa nan mes. Nan por acerca nan mayor cu e confiansa cu nan por combersa, y e hoben por expresa su preocupacion si e tin stress. Tambe por haci reunion familiar pa comparti cu otro”, Linssen a splica.
Linssen a bisa cu actualmente por yama 161 si tin mayornan cu kier conseho, por haci uso di e number aki. Nan lo ta dispuesto pa brinda ayudo di 81m te 9pm dialuna te diabierna. El a comparti cu nan ta dispuesto pa scucha y duna alivio.
Tienda di Educacion lo keda duna informacion y tips pa tur mayor riba rednan social, tur dia tin algo nobo. Nan lo duna tips creativo pa famianan por haci hunto.
“Nos ta aki pa sostene mayornan y yuda nan baha stress. Pa keda activo y sa kico nan por haci durante e dianan cu ta bin”, el a splica. Linssen ta comenta cu por tin caso cu tin famia den cual por tin grito y menasa. E ta compronde cu e situacion actual por ta fastioso, pero mester acepta esaki, pasobra no tin otro manera. E ta conseha pa hende mantene calma, planea kico tur mester na cas tambe ‘pa asina gasta menos placa’.
E ta recomenda pa adapta lo miho cu por na cas ‘y no perde cabes cu bo yiu’. Pa motibo di stress por reacciona di mal manera. E ta bisa cu ta importante ta pa sinta na mesa y wak kico por haci den e situacion actual.
Fundacion Tienda di Educacion lo keda bezig cu video pa duna tips riba rednan social, pa provee cualkier informacion pa duna sosten na comunidad. Tambe tin otro departamentonan cu ta brinda nan servicio den caso cu mester di un psicologo of psikiatra pa atende cu cierto asunto.
Na momento cu un mayor of mucha ta sinti cu ta perdiendo control, por haci uso di departamento. “Yama pa sinti alivio” y asina recupera calma. “Hala rosea pa calma y nos lo keda duna sosten.”
Pa emergencianan mas profundo, Linssen a bisa cu por yama polis si ta necesario. “Nan tin e crisis number” cu ta keda funciona. Pa famia cu ta pasando situacion financiero preocupante, por acerca Departamento di Asunto Social pa ricibi sosten. Nan organisacion lo keda disponibel pa persona manda mensahe, y lo duna contesta pa yuda.
