Recientemente, Minister di Husticia y Asuntonan Social Sr. Rocco Tjon a reuni cu e ekipo di Tienda di Educacion, entre otro trahadonan como tambe e directiva y directora nobo. A ricibi un presentacion di tur e servicionan cu nan ta brinda, pero tambe nan vision pa futuro, caminda mas y mas nan lo bay enfoca riba plataformanan digital pa brinda e guia y sosten na famianan y educadornan cu tambe ta hunga un rol importante den lantamento di mucha y hoben.
Banda di esaki, ta bay enfoca pa cambia e vision, caminda no ta solamente brinda guia na individuonan pero tambe na henter e sistema. Algun luna atras tambe a duna curso na diferente profesional den e cadena social
pa loke ta e sistema di “Multidimensionele Familietherapie” cual no ta enfoca solamente riba e individuo pero tambe riba henter e sistema cual ta resulta den solucionnan duradero, segun un comunicado di gobierno.
Banda di esaki, Tienda di Educacion ta traha cu diferente stakeholder den e cadena social, pa di e forma aki por brinda sosten na e cliente cu tin mester di esaki. Teniendo na cuenta cu educadornan tambe ta forma parti di e educacion y lantamento di mucha y hoben na Aruba, Tienda di Educacion tambe lo concentra su mes na duna guia y sosten na educadornan, pa di e forma aki nan tambe por sigui aporta positivamente na e desaroyo di nos mucha y hobennan. E no ta solamente brinda conseho, pero tambe brinda guia den e “hulpvraag” cu e individuo of famia tin, y nan ta keda monitor esaki, te ora cu e famia logra haya un solucion.
