— E aereolinea Arubiano Tiara Air a wordo declara bancarota ayeramainta dor di Corte. Segun e sentencia Tiara Air no a haci ningun pago despues cu a sera un acuerdo un aña pasa riba surseance van betaling (uitstel di pago).
Tiara su claim tabata cu tin pago for di Venezuela cu ainda mester drenta. Segun entrevista di Noticia Cla cu Alejandro Muyale, director di Tiara Aira, ta trata di un suma di riba 20 miyon dollar na entrada di benta di pasashi, acumula den 15 luna entre 2013 y 2014. Sinembargo e aerolinea no por a duna niun indicacion si y ki dia e placa aki lo drenta. Y asina huez a declara Tiara Air den bancarota, despues cu 6 ex-empleado a lanta un caso cu e meta di laga corte declara e compania bancarota. Argumento di e empleadonan pa lanta e caso tabata pasobra lo a duna prioridad na otro cos en bes di paga empleadonan, algo cu Muyale mes ta desmenti. Segun Muyale su declaracion na prensa, e suma cu tin riba caya lo bira hopi mas dificil pa haya awo cu su compania a wordo declara failliet. Riba dje a sali na cla awo cu Tiara Air tambe a perde su Aircraft Operating Certificate (AOC), locual kiermen cu nan no por bula mas tampoco.
Insel Air
Tiara Air no ta e unico aerolinea cu ta victima di falta di pago for di Venezuela. Insel Air tambe ta luchando cu problemanan di cash flow y mester a pidi gobierno di Corsou pa ayudo financiero. Por cierto, den caso di Insel Air e suma cu falta drenta for di Venezuela ta 100 miyon dollar, cinco biaha mas grandi cu di Tiara Air. Gobierno di Corsou a instala un comision di sabionan cu lo investiga estado economico di Insel Air profundamente hunto cu e compania mes y lo delibera tocante posibel solucionnan, cu lo mester wordo presenta aki un siman.
