Thrive Foundation yudando hobennan deportista realisa nan estudio y practica deporte

Thrive Foundation ta un fundacion relativamente nobo cu ta dedica na yuda hobennan deportista persigui nan soño di hunga deporte combina cu nan estudio den exterior. Na 2021 Randolph Oduber, presidente di Thrive Foundation, hunto cu su ruman y pareha a tuma e decision di haci e fundacion un realidad pa cuminsa yuda e hobennan cu soño- y aspiracionnan grandi pa nan futuro.

Oduber no ta desconoci den e mundo di deporte. El a lanta den e mundo deportivo y for di chikito e ta hunga baseball. Ora el a cumpli 19 aña el a sigui su estudio na Merca unda el a hunga baseball tambe dos aña. Despues el e haya e oportunidad pa firma profesional cu Washington Nationals y el a hunga cu nan te cu aña 2016. Despues di eynan el a sigui hunga profesional den otro liga y na mesun momento e tabata hunga cu e seleccion di Hulanda for di 2013

Na 2021 Oduber a dicidi cu e kier stop cu baseball pa mi cuminsa enfoca ariba su futuro. “Esaki pa mi ta encera coaching y mi tabata kier mi mesun negoshi y tin un stabilidad di sa unda mi kier yega den mi bida. Baseball no ta pa semper y mi tabata sa cu cada aña ta un aña importante y mi ta sinti cu e aña ey pa mi financieramente baseball no tabata duna mi locual mi tabata merece mas, dus baseball mes a bisa mi ta basta, maske mi curpa ta bisa mi sigui hunga, pero mi ta kere baseball mes a bisa mi ta tempo pa duna e siguiente stap,” el a splica.

E idea di e fundacion semper tabata den Oduber su mente y semper e kier a duna back na comunidad den un manera of otro. Despues cu COVID a yega el a tuma decision pa cuminsa move pa lanta Thrive Foundation Aruba.

El a splica cu e meta di e fundacion ta pa manda mas atleta afo pa nan por haci nan estudio hunto cu nan deporte. Pa Oduber ta hopi importante pa e muchanan por keda practica nan deporte mientras nan ta studia na un nivel halto.

“Mi ta kere esey ta un di e parti mas importante y duna back na comunidad tambe ora cu yega asina leu cu nos por recauda fondo pa duna back na comunidad, specialmente e parti estudio y deporte,” el a remarca.

El a sigui splica cu pa aworaki e studiantenan ta bay Merca solamente door cu e tin hopi experiencia bayendo Merca. El a agrega cu poco poco e ta hayando contacto cu Hulanda, pero Hulanda ta un tiki diferente pasobra e scolnan no ta hunto cu baseball, a menos cu e studiante bay un top school programa, cu cual e fundacion a cuminsa haya conexion pa den futuro talbes nan cuminsa bay den e direccion ey, pero aworaki nan ta enfoca riba Merca.

Oduber tin un vision cla pa su fundacion y esey ta sigura pa cada mucha caba nan estudio, pa nan hunga e nivel di deporte mas halto cu nan por hunga, duna back na comunidad y pa nan ta exitoso den nan bida.

“Mi ta kere pesey prome cu nos manda nan afo nos ta prepara nan fisicamente y mentalmente. Mi ta papia hopi cu nan pasobra mi sa cu e no ta facil. Bo no ta bayendo Hulanda, bo ta bayendo Merca y tin di nan ta bayendo scol nobo cu nunca niun Arubiano a bay, dus nan ta bay ta practicamente nan so y nan no conoce niun hende,” el a remarca.

Basa riba su mesun experiencia ora el a bay afo, e ta yuda e muchanan ta mentalmente prepara. “Bo por ta fisicamente prepara, pero si mentalmente bo no ta fuerte y sa kico pa haci durante cu bo ta bo so e ta bira un tiki dificil. Pa nan ta exitoso mi ta kere nan mester ta mentalmente fuerte y ta cla pa e reto nobo cu nan ta bay tuma,” el a agrega.

Pa loke ta e proceso pa manda e muchanan afo, Oduber a splica cu como cu e mes a bay college y tin conexion cu e coachnan ainda, esey ta un conexion facil. Pero tin biaha nan ta usa terceros cu tin hopi conexion y nan ta busca diferente scol cu e fundacion por scoge di dje pa manda e studiantenan atleta.

Un di e metanan cu e fundacion tin den e aspecto aki ta pa aki algun aña nan tin diferente opcion cu nan por scoge y manda e muchanan, basa ariba nan nivel, na diferente scol.

Oduber ta yuda muchanan cu ta train pa firma profesional, pero semper e ta hinca den nan cabes cu firma ta djis un stap, e no ta tur cos, y ta importante pa nan haci nan scol tambe.

“Mi ta purba di splica nan tin scol y hopi di nan na Aruba si cu 16 aña nan no a firma, pa nan e ta duro, pero mi ta splica nan cu si nan kier bay college, nan mester bay cu 18 pa 19 aña, dus nan tin algun aña pa warda y e pasenshi ey mi ta purbando di traha cu nan pa nan sa cu ta okay pa nan keda hunga y train na Aruba, haci nan scol trankil y cu 18-19 aña nos ta wak con leu bo ta. Por ta bo ta bay Hulanda of Merca. Hopi decision por wordo cambia durante e añanan ey y ora nan yega e edad necesario nos ta wak con nos ta yuda,” el a remarca.

Recientemente e fundacion a haci un clinica di baseball cu Hainley Statia, infield coordinator di Los Angeles Angel y manager di e ekipo nacional di baseball di Corsow. Plannan pa futuro pa e fundacion ta inclui haci mas clinica of camp, pero mester recauda fondo pa nan por cuminsa inverti mas.

E fondonan pa e fundacion ta bin di e fundacion mes y di Andrelton Simmons. Oduber ta splica cu na principio ora cu el a habri e fundacion, el a acerca Simmons cu ta un ex hungador di MLB y cu el a bay scol cune. “Mi a acerk’e y a splik’e e plannan y e ta e prome persona cu mi por bisa cu a inverti y a duna na e fundacion y cu te cu awe ainda nos ta usa su donacion,” el a agrega.

Un aspecto importante cu Oduber ta enfoca hopi riba dje ta disciplina. “Sin disciplina bo ta bay haya bo den problema y nos no kier esey pa nos fundacion,” el a enfatisa.

Pa e fundacion disciplina ta hopi importante y e puntonan na scol ta un parti hopi importante. Oduber ta splica cu durante estudio na un scol afo, e muchanan mester corda cu nan ta studiante atleta, no un atleta studiante y esey ta nifica cu scol mester ta bon y si e scol no ta bon, nan no por ta un atleta y nan no mag di hunga.

“Mi ta enfoca hopi riba esey y esey ta bin door di disciplina. Tin cierto cosnan manera sali ta leuk, pero nan tin nan momento y bo mester zorg pa e dos cosnan cu ta bo estudio y bo training ta na prome luga. Ora bo ta cla cu e dos nan ey bo por disfruta, mi no ta bisando bo no mag di disfruta, pero bo mester enfoca ariba bo meta prome,” el a resalta.

Apart di su fundacion, Randolph tambe a lansa su propio marca di ekipo derpotivo. El a splica cu e iniciativa a cuminsa cu tres otro pelotero cu cual e hunga hunto den seleccion. Nan tur a uni y lanta nan mesun marca, Dream Glove Co.

E oficina principal ta na Merca y nan ta traha hopi ekipo di baseball, glove, uniform, batting glove, faha, etc. y nan distribui rond mundo, no na Aruba so.

“Poco poco e ta bayendo bon, esaki ta nos di tres aña den dje, e ta bayendo sublime. Nos tin hungadornan den MLB ta usando e caba y mi ta kere cu aunke por ta mi no a yega MLB, pero nos producto si a yega MLB ta duna bo un bon sentimento cu bo ta riba un bon caminda. Semper nos ta habri pa scucha cosnan bon y cosnan malo, cosnan cu mester drecha. Mi ta kere cu esey ta haci nos unico cu nos kier sigui scucha y sigui mehora,” Oduber a finalisa.