Segun diferente articulo cu e medio di comunicacion local 24ora a publica dianan pasa, Three Rivers Real Estate VBA ta enfatisa cu e permisonan di construccion di DOW (Departamento di Obra Publico) pa construccion di Hotel Secrets na Baby Beach ta legal.
Three Rivers a tuma nota di acusacionnan cu nan ta considera grave y completamente infunda na unda e medio di comunicacion ta sigura cu Three Rivers no ta respeta e orden di sentencianan hudicial.
Mediante un comunicado pa prensa di 11 di mei ultimo, nan ta expresa cu nan a cumpli cu tur condicion legal rekeri pa permiso di construccion den cual e proceso a tuma su tempo prome cu Three Rivers a haya e permisonan necesario pa e construccion di e hotel aki.
“Tampoco ta berdad cu corte a anula e licencia di obranan duna na Three Rivers manera nan a afirma den nan articulonan, tabatin hopi casonan hudicial den añanan aki contra e permisonan di construccion otorga na Three Rivers cu semper a respeta e resultado di e sentencianan di corte, incluyendo esun ultimo.”
Nan a sigura cu nan ta evaluando nan opcionnan legal y nan ta bay continua manehando den pleno conformidad cu leynan di Aruba y sentencianan di corte.
“Three Rivers ta lamenta cu ta pinta e compania manera un desaroyado stranhero cu no ta cumpli cu leynan local y sentencianan di huesnan, esey ta leu di ta berdad, Three Rivers ta spera ansioso di por finalisa e proyecto hotelero pa por contribui na economia di Aruba specificamente na esun di San Nicolas.” E comunicado a indica.
For di mas di un siman hotel Secrets Baby Beach ta noticia den diferente medionan debi na un comunicado di prensa cu nan a manda indicando cu Grupo di habitantenan di Sero Colorado mediante un comunicado dirigi na medionan local a informa cu pa ley e proyecto Three Rivers tin un permiso di construccion suspendi y como tal no tabata autorisa pa a sigui traha riba su proyecto di hotel den area di Baby Beach.
